Mən, Süleymanzadə Bəhmən Emin oğlu, şəhid mayor Emin Süleymanovun oğluyam. Atam Emin Süleymanov 21 iyul 1977-ci ildə İmişli rayonunda polis ailəsində anadan olmuşdur. 1983–1992-ci illərdə orta təhsilini rus bölməsində almış, daha sonra 1992–1995-ci illərdə Cəmşid Naxçıvanski adına hərbi liseydə təhsilini davam etdirmişdir. 1995–1999-cu illərdə Bakı Ali Birləşmiş Komandanlıq Məktəbində (indiki Heydər Əliyev adına Azərbaycan Ali Hərbi Məktəbi) ali təhsil alaraq artilleriyaçı ixtisasına yiyələnmişdir. 1999-cu ildə ali hərbi məktəbi bitirdikdən sonra Gəncə şəhərində yerləşən "N" saylı hərbi hissədə leytenant rütbəsi ilə hərbi xidmətə başlamışdır. İkinci Qarabağ müharibəsi zamanı Şuşa istiqamətində yerləşən Daşaltı döyüşlərində qəhrəmancasına vuruşaraq şəhidlik zirvəsinə ucalmışdır.
Mən, Süleymanzadə Bəhmən Emin oğlu, 6 mart 2007-ci ildə anadan olmuşam, ilk təhsilimi rus bölməsi üzrə Balakən 1 saylı tam orta məktəbdə almışam. Hərbçi ailəsində dünyaya gəldiyimdən atam xidməti yerlərini dəyişdikcə təhsilimi Mingəçevirdə, Göygöldə, Gəncədə və s. bölgələrimizdə davam etdirmişəm. Gəncədə oxuduğum zaman atam məni cüdo idman növü üzrə məşqlərə yazdırdı. Qısa müddətdə müxtəlif zamanlarda birinci və ikinci yer tutaraq medallara layiq görüldüm. Çox təəssüf ki, qtam şəhid olduqdan sonra həyatımız tamam dəyişdi və mən bu idman növü üzrə məşqləri davam etdirə bilmədim. Atamın arzusu idi ki, nailiyyətlərim daha da çox olsun. Mən universitetə hazırlaşdığım üçün idmana davam edə bilmədim. Bundan başqa müxtəlif təlimlərdə iştirak etmişəm və sertifikatlarım var. 2024-cü ildə məqsədimə çataraq ADA Universitetinə qəbul olmuşam. Məqsədlərim çoxdur və buna çatmaq üçün çalışıram. Arzum odur ki , hər bir yeniyetmələrimiz öz məqsədlərində israrlı olub və buna nail olmaq üçün həvəsdən düşmədən irəliləsinlər.
“Zəfər” Şəhid Ailələrinə Dəstək İctimai Birliyi və Avstriya Azərbaycanlıları Cəmiyyətinin təşkilatçılığı, “Azərlotereya” ASC, “Azərbaycan Hava Yolları” (AZAL) QSC və Azərbaycan Diasporuna Dəstək Fondunun tərəfdaşlığı ilə 28 iyul – 2 avqust 2025-ci il tarixlərində Avstriyanın Zalsburq və Vyana şəhərlərində “Əmanətə Sədaqət” Yay Düşərgəsi keçirildi.⠀
Düşərgədə yerli və xarici universitetlərdə təhsil alan və yüksək akademik göstəricilərə malik 22 şəhid övladı iştirak etmişdir. Onların arasında mən də var idim. Biz Avstriyanın Zalsburq şəhərində olanda atamın əziz xatirəsinə həsr olunan Şəhanə Müşfiqin müəllifi olduğu ”Qutsal yolçu” adlı kitabını orada yerləşən Azərbaycan Evinə hədiyyə etdik.
⠀Yay düşərgəsində qəhrəman şəhidlərimizin tələbə övladları ilə birgə karyera planlaması, şəxsi inkişaf, liderlik və motivasiya mövzularında peşəkar təlimlərə qatıldıq, Zalsburq Universitetində təcrübə mübadiləsi proqramında iştirak etdik, həmçinin Avstriya mədəniyyətini yaxından tanıyaraq tarixi bölgələrə maarifləndirici səfərlər etdik.
Mən və bacım Emilya gördüyümüz işlərlə qəhrəman atamız şəhid mayor Emin Süleymanova və vətənimizə layiq olmağa çalışırıq. Bütün istedadlı, fəal və vətənpərvər gənclərə uğurlar arzu edirəm.
Xəbəri paylaş
