Azərbaycan xalqı böyük xalqdır. Bizim xalqımız istedadlıdır, vətənpərvərdir, mübarizdir, qürurludur, heç bir qüvvəyə baş əyməyəndir. Allah Taala uluların ulusu, yaxşıların yaxşısı, mərhəmətli, vicdanlı olan bu xalqa hər şey verib. Vətən dediyimiz yerin altı da, üstü də qızıldır - neft, qaz, qızıl yataqları, zəngin təbiət, böyük turizm potensialı və saymaqla bitməyən digər sərvətlər. Elə ona görə də xalqımızın başı zaman-zaman çox böyük bəlalar çəkib. Torpağımıza, sərvətlərimizə göz dikənlər bizə misligörünməmiş faciələr yaşadıblar. Ancaq bu xalq heç vaxt sınmayıb, müvazinətini itirməyib, qanı, canı bahasına öz Vətənini qoruyub, müstəqil dövlətini yarada bilib.
Xalqımızın böyüklüyü həm də ondadır ki, o, düzgün seçim edə bilib, taleyini kimə etibar etmək barədə müdrik qərar verib, ən çətin məqamlarda öz liderinin, xilaskarının ətrafında birləşməyi bacarıb.
Azərbaycan xalqı ötən əsrin 60-cı illərinin sonunda bir yola çıxıb – müstəqillik, inkişaf, tərəqqi yoluna. Bu yolu xalq özü müəyyənləşdirməmişdi. Ulu Tanrı bu yolun sahibini xalqımıza xilaskar kimi göndərmişdi. Və qısa bir zaman sonra Azərbaycan xalqı dərk etdi ki, onun nicatı, xoşbəxt gələcəyi ulu öndər Heydər Əliyevlə bağlıdır, millətin müstəqil dövlət qurmaq arzusunu yalnız O, reallaşdıra bilər. Beləliklə, məhz həmin dövrdə Azərbaycanı Azərbaycana qaytarmaq missiyasının təməli qoyulub, tariximizin Heydər Əliyev dövrü başlanıb.
Ümumilli liderimiz 1969-1987-ci illərdə Azərbaycanı müstəqilliyə hazırlayıb, xalqımızın müstəqil yaşaya bilməsi üçün bütün zəruri tədbirləri həyata keçirib. O, Azərbaycanı Azərbaycana qaytarmaq üçün xalqın milli özünüdərkini, milli yaddaşını, itirilmiş inamını, milli tarixini və ədəbiyyatını, milli sərvətlərini, milli ordusunu, müstəqil dövlətçilik atributlarını özünə qaytarıb. Və gerçək müstəqilliyi təmin edərək bu missiyanın birinci mərhələsini başa çatdırıb.
Azərbaycanı Azərbaycana qaytarmaq məramını tam gerçəkləşdirmək asan deyildi. Həmin missiyanı başa çatdırmaq üçün qarşıda xalqımızın tarixi düşmənlərinə qalib gəlmək, bölgədə marağı olan böyük dövlətləri neytrallaşdırmaq, itirilmiş torpaqları geri qaytarmaq kimi mühüm vəzifələr dururdu. Bunu isə bir insan ömrünə sığdırmaq mümkünsüz idi. Bu missiyanın başa çatdırılması, Azərbaycanın qüdrətli dövlətə çevrilməsi üçün bir möcüzə olmalı idi. Ulu öndər Heydər Əliyev canından çox sevdiyi Azərbaycan üçün o möcüzəni də yaradıb. O möcüzə müzəffər Ali Baş Komandan, Böyük Sərkərdə, görkəmli dövlət xadimi İlham Əliyevdir.
Prezident İlham Əliyev atasının yolu ilə gedərək xalqımızı qələbədən qələbəyə aparır, Azərbaycanı Azərbaycana qaytarmaq missiyasını uğurla davam etdirir. Hələ 2003-cü il oktyabr ayının 1-də xalqına ünvanladığı müraciətdə “Mənim tamamlanmamış çox perspektivli planlarım var” yazan Ulu Öndərimiz həyatının mənası olan Azərbaycanın qarşısında son xidmətini də göstərmiş, bu planları həyata keçirmək qüdrətində olan siyasi varisi barədə demişdi: “İlham Əliyev yüksək intellektli, praqmatik düşüncəli, müasir dünya siyasətini və iqtisadiyyatını gözəl bilən, enerjili və təşəbbüskar bir şəxsiyyətdir. İnanıram ki, mənim axıra çatdıra bilmədiyim taleyüklü məsələləri, planları, işləri İlham Əliyev başa çatdıra biləcək. Mən ona özüm qədər inanıram və gələcəyinə böyük ümidlər bəsləyirəm”.
Prezident İlham Əliyev Ulu Öndərimizin vəsiyyətinə əməl edir, Onun sona çatdıra bilmədiyi işləri bir-bir yerinə yetirir. Əlbəttə, Ümummilli Liderimizin ən böyük arzularından biri işğal edilmiş torpaqların geri qaytarılması idi. Ulu Öndərin siyasi varisi, Ali Baş Komandan İlham Əliyev 200 illik tarixi gedişi dəyişdirib, torpaqlarımızı işğaldan azad edib. Noyabrın 10-da Ermənistan-Azərbaycan Dağlıq Qarabağ münaqişəsinə son qoyulub. Həmin gün Azərbaycan Prezidenti, Rusiya Prezidenti və Ermənistan baş naziri tərəfindən imzalanmış üçtərəfli bəyanat məsələnin həlli istiqamətində son nöqtə olacaqdır.
Dövlət başçısı Azərbaycana rəhbərlik etdiyi 17 il ərzində buna hazırlaşıb, işğal edilmiş torpaqların geri qaytarılması missiyasının başa çatdırılması üçün gecəsini günüdüzünə qatıb, qüdrətli bir dövlət qurub. Ölkə rəhbərinin özünün də qeyd etdiyi kimi, biz yorulmadan, bütün təzyiqlərə baxmayaraq güc toplamışıq. İlk növbədə iqtisadi güc. Əgər iqtisadi gücümüz olmasaydı, bugünkü qələbəmizi əldə etmək mümkün olmazdı. Qələbənin təmin edilməsinin ən mühüm amillərindən biri də Ulu Öndərin qurub yaratdığı, Onun siyasi varisinin güclü, qüdrətli Silahlı Qüvvələrə çevirdiyi Azərbaycan Ordusudur. O ordu ki, onun döyüş qabiliyyətindən, qəhrəman əsgər və zabitlərindən indi bütün dünya danışır. Xankəndidə olan Fransanın “Le Monde” qəzetinin müxbirləri yazır ki, Şuşadan gətirilən yaralı erməni hərbiçilər əsasən tapança və bıçaq yaraları ilə gətirilib.
Bu, o deməkdir ki, şəhərin küçələrində əlbəyaxa döyüşlər olub və şanlı ordumuz düşmənlə qəhrəmancasına döyüşərək şəhəri geri qaytarıb. Rusiya mediası isə yazır: "Belə döyüş, dövlət, vətən sevgisi görən olubmu, demək çətindir?! Dağ yuxarı, şəhidi çiynində, döyüşə-döyüşə qan, tər içində qalxırdı Azərbaycan ordusu. Nə yaralını, nə də şəhidi əldən buraxırdılar. Nəfəs almadan Şuşaya çıxdılar...".
İşğal altındakı torpaqlarımızın düşmən tapdağından azad edilməsi əməliyyatlarında iştirak edən gənclərin çoxu heç Qarabağı görməyib. Ancaq onlar Vətən torpağı üçün canlarından keçiblər, qəhrəmancasına döyüşüblər. Doğrudur, vətən sevgisi, torpağın qorunması hissi bu millətin qanında, genində var. Amma o da var ki, son 27 il ərzində Heydər Əliyev yolu ilə gedən Azərbaycan dövləti Qarabağı unutmağa və unutdurulmağa imkan verməyib. Güclü ordu quruculuğu ilə yanaşı, işğal edilmiş torpaqlarımızı azad etmək üçün alışıb yanan vətənpərvər, peşəkar hərbçilər də yetişdirilib. Bu igidlər Şuşa şəhərini işğaldan azad edərkən mümkün olmayanı mümkün ediblər. Çünki onlar müzəffər Ali Baş Komandanlarına söz vermişdilər. Bu yolda ölmək vardı, ancaq geri qayıtmaq yox idi. Və o igidlər müasir hərb tarixinə elə bir şanlı səhifə yazıblar ki, bu qəhərəmanlıqdan bundan sonra dünyanın heç yerində bir də olmayacaq.
Azərbaycanın mənəvi paytaxtı Şuşanın işğaldan azad edilməsindən sonra Ali Baş Komandanın Ulu Öndərin məzarını ziyarət etməsi, bu xəbəri Şəhidlər Xiyabanında xalqa çatdırması mühüm tarixi hadisədir. Bu, müstəqil Azərbaycanın qurucusuna, dövlət müstəqilliyimizin əldə olunması, ərazi bütövlüyümüzün qorunması üçün canından keçənlərə böyük ehtiram nümunəsidir.
Şuşa zəfərinin Azərbaycan xalqına çatdırılmasından öncə Ulu Öndərin və Şəhidlər Xiyabanının ziyarət olunmasının rəmzi mənası var. Dahi şəxsiyyət İlham Əliyev bu müdrik addımı ilə hər kəsə göstərdi ki, bu xəbəri hamıdan əvvəl bilmək məhz onların mənəvi haqqıdır. Prezident İlham Əliyev bu dəfə Fəxri Xiyabana atasının ən böyük vəsiyyətini yerinə yetirən Sərkərdə, Şəhidlər Xiyabanına isə qalib ordunun müzəffər Ali Baş Komandanı, qalib xalqın Lideri kimi gedirdi. Bu, şəhid analarına övladlarının qisasının alındığı ilə bağlı verilən mesaj, həm birinci, həm də ikinci Qarabağ savaşında şəhid olanlara olan borcumuzun qaytarılması idi. Bu, həm də Ona tapşırılan və uğurla icra olunan vəzifənin hesabatı idi. Bu, tarixi vəzifənin yerinə yetirilməsi barədə bugünkü xoş günlərimizin, müstəqil, qüdrətli dövlətimizin müəllifinə, millətin Ulu Öndərinə, əbədi Ali Baş Komandanına Onun davamçısının etdiyi tarixi məruzə idi.
“Mən bu gün, eyni zamanda, ulu öndər Heydər Əliyevin məzarını ziyarət etdim, onun ruhu qarşısında baş əydim. Ürəyimdə dedim, xoşbəxt adamam ki, ata vəsiyyətini yerinə yetirdim. Şuşanı azad etdik! Bu, böyük Qələbədir! Şəhidlərimizin, Ulu Öndərin ruhu şaddır bu gün!” Prezident İlham Əliyevin səsləndirdiyi bu fikirlər bütün təhdid və təzyiqlərə baxmayaraq, Ümummilli Liderimizin Azərbaycanı Azərbaycana qaytarmaq missiyasının davam etdiriləcəyindən xəbər verir. Dahi şəxsiyyətin xilaskarlıq missiyasının sonu isə Şimallı Cənublu, Şərqli Qərbli Böyük Azərbaycandır.
Heydər Əliyev xilaskarlıq missiyasının davamçısı olan İlham Əliyev artıq özü xalqın Xilaskarına çevrilib. Prezident İlham Əliyev Azərbaycan üçün tək döyüşür, mübarizə aparır,
bütün təhdid və təzyiqlərə dözür. Onun yeganə dayaq nöqtəsi xalqıdır. Millətindən güc alan Ali Baş Komandan dünyada heç bir liderin edə bilmədiyini edir, heç kimin göstərə bilmədiyi cəsarət nümayiş etdirir.
Prezident İlham Əliyevin hələ bu ilin iyul ayında ATƏT-in Minsk qrupuna ünvanladığı suallar haqlı mövqeyimizin ifadəsi, böyük cəsarət nümunəsi idi: “Nədir bunların bəyanatında əsas tezis - hərb variantı mümkün deyil. Kim deyir? Gedin açın BMT-nin Nizamnaməsini, baxın görün özünümüdafiə hüququ var ölkələrdə, yoxsa yox? Yoxsa siz özünüzü nə hesab edirsiniz?! Siz BMT-dən də üstünsünüz?! BMT-nin Nizamnaməsindən də üstünsünüz?! Belədirsə, gedin deyin, biz Minsk qrupunun həmsədrləri hesab edirik ki, BMT-nin Nizamnaməsində əks olunan bu tezis yanlışdır. Axı gərək hər şeyin həddi olsun... Biz haqlı olmağımızı həm beynəlxalq arenalarda göstərmişik, həm də döyüş meydanında və heç kimin Aprel döyüşləri yadından çıxmasın”.
Bu kəskin sualların dünyanın hansı güc mərkəzlərinə yönləndirildiyini anlamaq o qədər də çətin deyildi. Prezident xəbərdarlıq etmişdi və son 45 gündə olanlar hamımıza məlumdur. Dövlət başçısı noyabrın 8-də Azərbaycan xalqına müraciətində yenə də xalqımızla açıq danışdı, həmin güc mərkəzlərinin nəyə nail olmaq istədiyini bir daha bütün dünyanın diqqətinə çatdırdı: “Danışıqlar prosesində Ermənistan tərəfi, sadəcə olaraq, vaxt udmaq istəyirdi, sadəcə olaraq, status-kvonu möhkəmləndirmək, əbədi etmək istəyirdi. Bu illər ərzində dəfələrlə Azərbaycana müxtəlif güc mərkəzlərindən göndərilən siqnallar bizi vəziyyətlə barışmağa sövq edib. Ancaq biz qətiyyət, cəsarət, siyasi
iradə göstərərək Azərbaycan xalqının maraqlarına cavab verməyən heç bir razılaşmaya getmədik. Mən dəfələrlə bütün beynəlxalq kürsülərdən bəyan etmişdim ki, torpaqlarımızın, ərazi bütövlüyümüzün bərpa edilməsi bizim əsas vəzifəmizdir və biz bu vəzifəni icra edirik”.
Bu sözlər göstərir ki, Prezident necə çətin bir işi reallaşdırıb, hansı təhdid və təzyiqlərə sinə gərib, bunun üçün kimlərlə mübarizə aparıb. Fakt odur ki, bu güc mərkəzləri yeni dünyanın güclü lideri ilə hesablaşmağa məcbur olublar. Onlar da bilir ki, İlham Əliyev üçün Azərbaycanın müstəqilliyinin, dövlətimizin ərazi bütövlüyünün qorunmasından önəmli heç nə yoxdur. Bu həm də yeni tarixi mərhələnin liderinə Ulu Öndərimizin vəsiyyətidir. Prezident oktyabrın 16-da Türkiyənin “A Haber” televiziya kanalına müsahibəsində jurnalistin “Yəqin ki, Qarabağı azad etmək rəhmətlik atanızın vəsiyyətidir. Vəsiyyətini də yeri gəlmişkən Sizdən öyrənmək istərdik. Vəsiyyətini hazırda həqiqətən yerinə yetirirsiniz. Atanızın vəsiyyəti barədə nə söyləmək istəyirsiniz?” sualına belə cavab vermişdi:“Bilirsiniz, mən hər zaman çalışmışam ki, atamın yoluna sadiq olum. 2003-cü ildə ilk dəfə Azərbaycan xalqı mənə etimad göstərəndə seçkilərdən əvvəl mən demişdim ki, əgər siz mənə bu inamı, etimadı göstərsəniz, mən Heydər Əliyev siyasətinə sadiq olacağam, bütün istiqamətlər üzrə Onun yolu ilə gedəcəyəm. Şadam ki, sözümə sadiq oldum, sözümü tutdum. Bu gün Azərbaycanın sürətli və uğurlu inkişafı, beynəlxalq müstəvidə böyük hörmətə malik olması, ölkə daxilində sosial, iqtisadi, digər problemlərin həlli, böyük layihələrin həyata keçirilməsi, əlbəttə ki, Heydər Əliyev yolunun davamıdır. Təbii ki, dünya dəyişir. Dünyadakı güclər nisbəti də dəyişir. Bugünkü dünya 2003-
cü ildəki dünya ilə əlbəttə ki, müqayisə edilə bilməz. Ancaq bizim strateji hədəflərimiz dəyişməz olaraq qalır. O da müstəqilliyi möhkəmləndirmək, müstəqil siyasətə sadiq olmaq, heç vaxt heç kimdən asılı olmamaq, heç kimin qarşısında baş əyməmək, öz qürurumuzu saxlamaq, qorumaq və ərazi bütövlüyümüzü bərpa etməkdir. Yəni, qısa desəm, atamın vəsiyyəti bundan ibarətdir”.
Ulu Öndərin xilaskarlıq missiyasında Qarabağın azadlığına qovuşmasından sonra Azərbaycanın bütövləşməsi, Türk dünyasının quru yol əlaqəsinin bərpa edilməsi üçün Naxçıvanın blokadadan çıxarılması da vardır. Ölkə rəhbəri Ümummilli Liderimizin bu vəsiyyətinin də yerinə yetirilməsi üçün fəal iş aparıb. Dövlət başçısı Rusiyanın TASS informasiya agentliyinə videomüsahibəsində jurnalistin Laçın dəhlizi ilə bağlı sualını cavablandırarkən bu məsələyə də toxunaraq deyib: “Laçın dəhlizi baza prinsiplərinin tərkib hissəsidir. Bununla bərabər, axı baza prinsiplərində yazılıb ki, təkcə Laçın dəhlizi deyil, bütün kommunikasiyalar, həmçinin Azərbaycanın əsas hissəsi ilə Naxçıvan arasında kommunikasiyalar açılır”.
Bu, xilaskarlıq missiyasının növbəti mərhələsidir. Naxçıvanın blokadadan çıxarılmasına çox az qalıb. Noyabrın 10-da imzalanan bəyanatda bu məsələ də öz əksini tapıb. Dövlət başçısı Azərbaycan xalqına müraciətində bu müjdəli xəbəri də öz xalqı ilə bölüşüb: “Naxçıvan Muxtar Respublikasının Azərbaycanın əsas hissəsi ilə əlaqəsi bu sənəddə təsbit edilir. Həm bütün kommunikasiyaların, yolların açılması, eyni zamanda, burada göstərilir ki, yeni nəqliyyat kommunikasiya infrastrukturu yaradıla bilər və yaradılmalıdır. Biz bunu əlbəttə ki, çox dəstəkləmişik. Deyə bilərəm ki, mənim təkidimlə bu bənd bu bəyanata salındı. Çünki birbaşa Ermənistan-Azərbaycan Dağlıq Qarabağ münaqişəsi ilə bu bəndin əlaqəsi yoxdur. Ancaq mənim təkidli tələblərim şadam ki, qəbul olundu. Beləliklə, Naxçıvan Muxtar Respublikasını Azərbaycanla, Azərbaycanın əsas hissəsi ilə quru yollarla birləşdirmə istiqamətində tarixi addım atıldı”.
Prezident İlham Əliyev yeni tarix yazır. O, Ulu Öndər Heydər Əliyevin yolunu davam etdirir, Onun vəsiyyətlərini yerinə yetirir. O, Heydər Əliyev kimi, Azərbaycan xalqının inamını özünə qaytarır, xalqı bir yumruq kimi birləşdirməyə nail olur. O, bu gün müstəqil siyasət yürüdən, dünyada heç bir qüvvənin təsir edə bilmədiyi Azərbaycanı daha qüdrətli dövlətə çevirir. O, yeni dünya düzəninin formalaşdırılmasında fəal iştirak etməyə iddialıdır. O, bu niyyətini reallaşdıraraq kiçik ölkə olan Azərbaycanı dünyanın böyük siyasi mərkəzinə çevirmək istəyir. Yaxın gələcəkdə Azərbaycan dünyada müəyyən siyasi qərarların qəbul edilməsində həlledici rol oynayacaqdır. Qarabağ qələbəsi bizi daha böyük qələbələrə aparacaqdır. Heç şübhə yoxdur ki, Heydər Əliyev yolu ilə gedən qüdrətli Azərbaycan dövləti Qarabağ kimi digər itirilmiş ərazilərimizi də xilas edərək xalqımıza qaytaracaqdır. Prezident İlham Əliyevin daha qüdrətli Azərbaycanın qurulması yolundakı fədakar xidmətləri öz nəticəsini verəcək, Azərbaycanın Azərbaycana qaytarılması missiyası uğurla başa çatdırılacaqdır.
Tural Səfərov,
“Azərxalça” Açıq Səhmdar Cəmiyyəti İdarə Heyəti sədrinin müşaviri
