![Naxçıvanda 700 yerlik Qəbul Planı hazırlanıb](https://files.modern.az/photo/orginal/2024/07/23/1721763841_5f4bfb66-60d5-34ea-8d8b-c8da6e7486ab_850.jpg)
Bunu Naxçıvan Muxtar Respublikası Təhsil nazirliyinin əməkdaşı Nuray Həsənova jurnalistlərə müsahibəsində bildirib.
Naxçıvan Muxtar Respublikasının sosial-iqtisadi inkişafına dair 2023-2027-ci illər üçün Dövlət Proqramı”nda muxtar respublikada əmək bazarının tələblərinə cavab verən müasir tipli peşə təhsili müəssisələrinin təşkili nəzərdə tutulub. Dövlət proqramının icrası ilə əlaqədar Naxçıvan Muxtar Respublikası Ali Məclisi tərəfindən 2024-cü il 7 may tarixində “Naxçıvan Muxtar Respublikası Təhsil Nazirliyinin tabeliyində olan peşə təhsili müəssisələrinin fəaliyyətinin təkmilləşdirilməsi haqqında” Fərman imzalanıb. Fərmana əsasən Naxçıvan Texniki Peşə və Sürücülük Məktəbi publik hüquqi şəxsi və Naxçıvan Şəhər Peşə Liseyi birləşdirilərək, onların bazasında Naxçıvan Dövlət Peşə Təhsil Mərkəzi publik hüquqi şəxsi yaradılıb, Şərur və Ordubad Texniki Peşə və Sürücülük məktəbləri isə peşə liseyinə çevrilməklə publik hüquqi şəxs statusu verilib.
Naxçıvan Muxtar Respublikası Təhsil nazirliyinin əməkdaşı Nuray Həsənova qeyd edib ki, fərmanın icrasının təmin edilməsi məqsədilə Naxçıvan Muxtar Respublikası Nazirlər Kabineti tərəfindən 3 iyun 2024-cü il tarixdə Sərəncam imzalanıb. Sərəncamın icrası ilə əlaqədar olaraq Təhsil Nazirliyi tərəfindən müasir tipli peşə təhsili müəssisələrinin Nizamnamələri və ştat cədvəlləri tərtib olunub, layihə və təkliflər aidiyyəti üzrə təqdim olunub. Həmçinin dövlət proqramının icrasının davamı olaraq cari ilin sonunadək peşə təhsili müəssisələrinin hər birində qəbul planında verilən ixtisaslara uyğun 1 emalatxananın qurulması və peşə təhsilli gənclərin sayının artırılması nəzərdə tutulur.
Naxçıvan Muxtar Respublikası Təhsil Nazirliyi tərəfindən əmək bazarının tələbləri nəzərə alınaraq peşə təhsili müəssisələrimizdə 600-ü dövlət sifarişi, 100-ü ödənişli olmaqla, müxtəlif ixtisaslar üzrə 2024-2025-ci tədris ili üçün 700 yerlik Qəbul Planı tərtib olunub.