Rusiyada Murmansk vilayətinin Oleneqorsk rayonunda qar uçqunu olub, qarın altında on beş nəfərin qaldığı ehtimal edilir."RegionTV.info" xəbər verir ki, bu barədə “TASS”a Oleneqorskun rəhbəri Oleq Samarski bildirib.
“İlkin məlumata görə, qarın altında 15 nəfərdən ibarət turist qrupu qalıb. Onların hansı yolla getdikləri hələ bəlli deyil. Xilasedicilər ərazidə işləyirlər”-deyə o bildirib.
İstintaq Komitəsinin bölgə üzrə rəsmilərinin verdiyi məlumata görə, uçqun baş verən ərazidə azyaşlıların ola biləcəyi ehtimal edilir: “Rusiya Federasiyası İstintaq Komitəsinin Murmansk vilayəti üzrə İstintaq İdarəsinə məlumat daxil olub ki, İmandra stansiya bölgəsində nəzarət olunmayan marşrutda turistlərdən ibarət qrup qar uçqununun altında qalıb. İlkin məlumata görə, hadisə nəticəsində xəsarət alanlar var. Rusiya İstintaq Komitəsinin müstəntiqi və məhkəmə ekspertləri hadisə yerinə yollanıblar. Xəsarət alanların arasında azyaşlılar da ola bilər”.
Rusiya Fövqəladə Hallar Nazirliyinin məlumatına görə, uçqun altında uşaq var. Orada 13-ü uşaq olmaqla daha 15 nəfər ola bilər: “Turistik qrup 16 nəfərdən ibarətdir, onlardan 13-ü yetkinlik yaşına çatmayanlardır”.
Hadisə İmandra stansiyasından 5 km aralıqda, Murmansk vilayətinin xizək marşrutlarının keçdiyi Monçeqorsk və Oleneqorsk bölgələrinin sərhədində baş verib. Mənbənin verdiyi məlumata görə, turistlər bir marşrut seçsələr də, başqa bir marşrutla gediblər.
