"RegionTV.info"Əmlak Məsələləri Dövlət Xidməti bir il ərzində sənədsiz evlərin sənədləşdirilməsi prosesini yekunlaşdıra bilər.
Bunu ARB24-ün “İş vaxtı” verilişinə müsahibəsində əmlak eksperti Ramil Osmanlı deyib. O bildirib ki, Əmlak məsələləri üzrə Dövlət Komitəsinin strukturunda baş verən dəyişikliklər bu prosesin uzadılması səbəblərindən biridir:
“Lakin konsepsiyanın qəbulundan sonra prosesin icrasının gecikməsi səbəbləri aydın deyil. Komitə tərəfindən o zaman Bakı və Abşeronda 165 mindən, respublikanın ayrı-ayrı ərazilərində 70 mindən artıq fərdi ev inventarlaşdırılmışdı. Bu, mövcud rəqəmlərin heç yarısı deyil”.
Ekspert sənədləşdiriləcək və ya kompensasiya veriləcək evlər barədə də məlumat verib:
“Konsepsiyaya əsasən elektrik və qaz xətlərinin, magistral neft borularının, magistral yolların olduğu yerlərdə, aktiv mədən və vulkanik ərazilərdə tikilən evlər istisna olmaqla, digər evlərin sənədləşdirilməsinə icazə veriləcək. Vulkanik, aktiv mədən ərazilərdə inşa olunan və söküntüsü nəzərdə tutulan evlər üçün isə vətəndaşlara müəyyən kompensasiya ödənilməsi nəzərdə tutulur”.
Ramil Osmanlı sözügedən evlərin sənədləşdirilmə prosesindən sonra onların qiymətinin 20 faiz artacağını bildirib:
“Hazırda sənədli və sənədsiz torpaqların qiymətində 2-3 qat fərq var. Bir neçə sot torpaq sahəsi evin tikintisindən sonra kifayət qədər böyük qiymət fərqinə yol açır. Sənədləşmə prosesinin icrasından sonra bu evlərin ümumi dəyərində 20 faizə qədər qiymət fərqi yaranacaq. Yəni həmin evlər bu gün 50 min manata satılırsa, sənədləşmədən sonra bazara onlar 60-65 min manata daxil olacaq.
Prosesin ən vacib tərəfi isə odur ki, sənədləşmədən sonra bu evlərdən dövlət büdcəsinə daxilolmalar artacaq. Hesablamalara görə, il ərzində Azərbaycan sənədsiz evlərə görə 50 milyon manatdan artıq vəsait itirir”.
