Keçmiş deputat Gülər Əhmədova Yenisabah.az-ın suallarını cavablandırır.

- Gülər xanım, bir neçə gündür ki, Ramiz Mehdiyevin nəvəsinin toyu ilə bağlı qalmaqal yaşanır. Koronavirus pandemiyasına görə kütləvi tədbirlərin, o cümlədən toyların qadağan edildiyi vaxtda belə bir addım atılmasını necə qiymətləndirirsiniz?
- Heç bir halda qaydaları pozub toy etmək doğru deyil. Qaydalar elə birinci deputatlar tərəfindən nəzərə alınmalıdır. Ağız dolusu danışmazdan əvvəl zəhmət çəkib özləri də qaydalara əməl etsinlər. Ondan sonra xalqdan nəsə tələb etsinlər. 
- Bu gün Ramiz Mehdiyev tənqid hədəfindədir. Hətta vaxtilə ona yaxınlığı ilə seçilən şəxslər belə, bu tənqidlərə qoşulub. Sizi də onun adamı hesab edirdilər...
- Mən Ramiz Mehdiyevin yaxın adamı olsaydım, həbs olunmazdım. Hamı çox gözəl bilir ki, kim kimin adamı olub?! Ramiz Mehdiyev mənim üçün nə edib? Bəlkə ərimi, qardaşımı, oğlumu, bacımı vəzifəyə qoyub, mənə universitetdə kafedra verib?  Mən onun adamı olsaydım, həbsdən sonra 8 il işsiz qalardım? Abel Məhərrəmov nəyə görə mənə iş vermədi? Mənə zorla ərizə yazdırdı. Halbuki ona dövlət başçısı səviyyəsində deyilmişdi ki, icazə verin dərsini desin. Niyə məni onlarla müqayisə edirlər? Mənim evimdə bir adam işləmir. Yoldaşımı işdən qovdular. Kimdən soruşduqsa, “Ramiz Mehdiyevin tapşırığıdır” dedi. 
Kütlə deyə bilər ki, filankəs Ramiz Mehdiyevin adamıdır. Heç bir sübut olmadan məni niyə həbsxanaya apardılar? Uşağımın ad günündə imkan vermədilər ki, onun tortunu kəsim. Mən onlardan xahiş elədim ki, heç olmasa uşağımın tortunu kəsim, plovunu qazın üstündən götürüm. İcazə vermədilər. Mənə nə sübut elədilər? Üstümə  gətirib qoydular ki, sən adam öldürmüsən. Sübut etdilər? Respublika Uşaq Təşkilatı kimi təşkilat yaratmışdım.  Onu dağıtdılar. “Mərkəz” qəzetim var idi. Onu əlimdən aldılar. Mənəm Mehdiyevin adamı?!
- Belə iddialar var ki, Milli Məclisdə Ramiz Mehdiyevin deputat komandası olub. Siz də uzun illər parlamentdə təmsil olunmusunuz. Deyilənlər doğrudurmu?
- Əlbəttə ki, Ramiz Mehdiyevin ətrafında olan insanlar olub. Amma məni həmin sıraya yazmaq sadəcə gülməlidir.  Bəzi jurnalistlərə də gülməyim gəlir. Onlar düşünmürlər ki, bu şəxs Mehdiyevin adamı olsa, belə günə düşərdi?! Ağlı olan adam başa düşərdi, amma düşmədilər. Bizə ən böyük zərbəni Abel Məhərrəmov vurub. Ramiz Mehdiyevin adamı Abel Məhərrəmovdur ki, bizə zərbəni zərbə dalınca vurdu. Mənim oğlum BDU-da  əyani aspiranturada oxuyurdu. Onu BDU-dan səbəb göstərmədən çıxardılar. Sonra da götürüb əsgər apardılar. 
Getdim ki, dərsimi deyim, mənə dedilər ki, ərizəni yaz. Səbəbini soruşdum, cənab Prezidentin zərfini aldığımı dedim, mənə “məsləhət deyil” dedilər.  Hər şeyin üstü indi açılır. Mən danışmaq istəmirəm, amma bir az düşünmək lazımdır ki, əgər bu, Ramiz Mehdiyevin adamıdırsa, niyə bu gündədir?! Ramiz Mehdiyevin bütün adamları-arvadları, ərləri, uşaqları, özləri vəzifədədirlər. Mənim evimdəki hər kəsi işdən çıxardılar. Həbsdən çıxanda sonra iş vermədilər. Necə olur ki, biz Ramiz Mehdiyevin adamı oluruq, həm də rəzil gündə yaşayırıq?! 
- Bəs sizin barənizdə bu iddialar haradan qaynaqlanır?
- Mən istəyirəm ki, Azərbaycanlılar bir az həqiqəti görsünlər. Bu, təkcə mənimlə bağlı deyil, ümumiyyətlə başqa biri ilə bağlı da hər deyilənə həmin dəqiqə inanmasınlar. Adam haqqında çox söz deyərlər. Sən bir bu adamın oturuşuna-duruşuna, həyatına bax, deyilən şeylərə uyğun gəlib-gəlmədiyinə nəzər sal. Çox adama çox şey deyərlər. 
Mən 1993-cü ildən bəri  işləmişəm. Jurnalistlərə həmişə deyirəm ki, özlərinin bir mövqeyi olsun, adıma yazmadıqları qalmadı. Bir baxsınlar ki, onlara verilən informasiya nə dərəcədə doğrudur.  Mən necə dəfə çıxıb dedim ki, işsizəm. Bunları eşitməyiblər? Ramiz Mehdiyevin adamı belə gündə yaşayar? Dəfələrlə dedim ki, yoldaşım onkoloji xəstədir, müəllimdir, ona dərs verin, səs çıxmadı. 
Danışan adamlar indi danışırlar. Onların  hər şəraiti var. Övladları vəzifədədir, arvadları da məktəb direktorudur. Onlarla məni götürüb müqayisə eləsinlər, görək, mənlə onları bir tərəziyə qoya bilirlər?! Sadəcə mən ağlamağı  sevən adam deyiləm. Mən 1-2 dəfə sözümü deyib, kənara çəkilirəm, çünki gecə-gündüz oturub ağlamağı özümə əskiklik bilirəm. Aydın Mirzəzadəyə, Elman Nəsirova mənim gülməyim gəlir. Bunlar Ramiz Mehdiyevin şah əsərləridir. Bunlar o vaxt məni gecə-gündüz söyürdülər, haqqımda demədikləri qalmamışdı. Kimdən məni niyə söydüyünü soruşurdumsa, mənə deyirdilər ki, aparatdan tapşırıblar. 
Mənə Ramiz Mehdiyevin adamı deyən jurnalistlərin özləri kim idilər ki?!  Haqqımda şər-böhtan yazırdılar.  Onların bir çoxu ilə mənim gözəl münasibətim olmuşdu, yüz dəfə də yaxşılıq eləmişdim. Amma haqqımda yazmadıqları qalmadı. Bu qədər şey oldu, heç kimə heç nə demədilər,  amma Gülər Əhmədovanın anasını ağlatdılar.
- Sizcə, Ramiz Mehdiyevi tənqid edənlər ona münasibətlərində səmimidirlər? 
- Yeni Azərbaycan Partiyasının “Səs” qəzeti var. O vaxt o qəzet mənim haqqımda olduqca təhqiramiz ifadələrə yer vermişdi. Bilənlər bunu yaxşı bilir. Səhv etmirəmsə, yazan Bəhruz Quliyev idi. Mən sonradan onlardan niyə belə etdiklərini soruşdum. Çünki YAP-ın quruculuğunda uzun müddət çalışmış adamam. Mənə bunu onlara aparatdan tapşırdıqlarını dedi. İndi bunlar  çıxıb Ramiz Mehdiyevi tənqid edirlər. Halbuki bunlar Ramiz Mehdiyevdən, Əli Həsənovdan ən çox yararlanan insanlardılar. “Səs” qəzeti tənqid edir, Aydın Mirzəzadə tənqid edir... Bax, hər gün bir sifətə dönən adamlar bunlardılar. Ramiz Mehdiyevə  dövlətin sütunu deyən admalar indi hamıdan qabağa qaçıb tənqid edirlər. Bunları doğrudan da görmürlər? Gərək, bunlar deyilsin? 
Adam var ki,  vəziyyətin dəyişdiyini görən kimi hamıdan qabaq qaçır. Mənim elə xasiyyətim yoxdur. Mən yıxılan adamı kimliyindən asılı olmayaraq vurmuram. Düzdü, qadın olmağıma, körpə uşağıma baxmadan nə qədər pislik varsa, etdilər. Amma mənim elə xasiyyətim yoxdur.  Sadəcə mənim acığıma gələn şey odur ki, mən bunun adamı olmadığım halda, belə dedilər. Yaxşı bir məsəl var, elə yerinə düşür: İsinmədik istisinə, kor olduq tüstüsünə... 
Küçədən keçən adam Ramiz Mehdiyevin adamı olduğumu deyə bilər. Amma jurnalistin vicdanı olmalıdır. Əli Həsənovun  tapşırığı ilə Gülər Əhmədova haqqında böhtan yazan onlar deyildimi? Mənim haqqımda yazdıqlarını görsəniz, şoka girərsiz. Həmin o “Səs” qəzeti bir nömrəli adamlarıydı. İndi bunlar Ramiz Mehdiyevi tənqid edən olublar. Adamın bir sifəti olar, adam kişi olar. Ayaqqabısından öpürdülər, indi nə oldu? Mənim gətirib bir nəfər vəzifədə olan adamımı göstərsinlər. Villalarımın, şadlıq evlərimin  olduğunu yazırdılar, hardadı onlar?! Dünən gələn adamlar, özlərinə böyük biznes qurublar. Bizim isə yeddi arxa dönənimiz Bakıda yaşayıb, amma heç nə yoxdur. Bizim bir evimiz, bir dənə də maşınımız var. Bunların simasını göstərmək lazımdır. 
Onlara bir-bir zəng vurdum ki, haqqımda tərbiyəsiz şeylər yazmasınlar, mənim oğlanlarım, qardaşlarım var. Amma nə fayda... İndi çıxıb Mehdiyevi bəyənmirlər. Göydə Allah var. Adam istənilən vəzifədə ola bilər, amma gərək vicdanı olsun. Həqiqət elə bir şeydir ki, gəlib yerini tutur.  Gərək, haqqın tərəfində olasan. Öləndə də insan kimi öləsən. Mən yalan danışmamışam. Heç nə sübut edə bilmədilər. Çox böyük iyrəncliklər var. Mən bunlardan bezmişəm, çalışıram ki, heç onların yanından da keçməyim. Hər şeyi qatıb qarışdırdılar və zibilini çıxardılar. 
Mənim qədər qaçqınlarla kim işləyib? Axırıncı qaçqın düşərgəsi götürülənədək mən  işləmişəm. Bunu minlərlə adam bilir. Hər rayonla-şəhid ailəsi, qazi ailəsi, əlillərlə bağlı mənim siyahılarım var idi. Mən sadəcə reklam sevmirəm. İndi gedib iki kiloqram makaron alırlar, gecə-gündüz onu nümayiş etdirirlər. Yaxşı görünmür, ancaq pis bir şeyi həmin dəqiqə böyüdürlər. Biz bayramlarda o ailələrin payı çatmamış evimizdə oturmurduq. Mən səmimi deyirəm ki, simasız, riyakar, yalançı, ağızlarına gələni yazan adamlardan iyrənmişəm. Adamın bir siması olar. Jurnalistikaya dəxli olmayan, mənasız, məzmunsuz adamalara ev veriblər, hörmətli, ehtiyacı olan jurnalistlərimiz bir tərəfdə qalıblar. Mehdiyevin adamlarını elə tapsınlar. Harda döyülüb-söyülən adam varsa, Mehdiyevin adamıdır deməsinlər. Abel yarımştat dərsi də qoymadı ki, mən keçim...