Bu gün şəhid jurnalist, Azərbaycan Televiziyasının operatoru Sirac Abışovun doğum günüdür.
O, 29 avqust 1989-cu ildə Qubadlı rayonunun Dondarlı kəndində dünyaya göz açıb. Bu gün Siracın 37 yaşı tamam olacaqdı. Lakin onun ömrünün 31-ci ilində kamera arxasında başlayan bir yol şəhidlik zirvəsində başa çatdı. Sirac Abışov Birinci Qarabağ müharibəsi zamanı ailəsi ilə birlikdə doğma yurdundan didərgin düşərək Sumqayıtda yaşamağa başlayıb. O, 2019-cu ildən Azərbaycan Televiziyasında operator kimi fəaliyyət göstərib. Operator üçün kamera sadəcə texniki vasitə deyil. O kamera hadisələri yaddaşa çevirir, insanların danışdıqlarını, yaşadıqlarını, bəzən isə sözlə ifadə olunmayan ağrıları gələcək nəsillərə çatdırır. Sirac da öz peşəsini belə yaşadı.
İşğaldan azad edilmiş torpaqlara qayıdışın başladığı günlərdə jurnalistlər üçün Qarabağ artıq yalnız reportaj mövzusu deyildi. Bu torpaqlar həm də illərlə həsrətində olduqları yerlər idi. Sirac üçün də bu səfərlərin xüsusi mənası vardı. Çünki doğulduğu Qubadlı Birinci Qarabağ müharibəsindən sonra ailəsinin tərk etmək məcburiyyətində qaldığı yurd idi.
Lakin 2021-ci il iyunun 4-də onun növbəti səfəri son səfərinə çevrildi.
Həmin gün Sirac Abışov AZƏRTAC-ın müxbiri Məhərrəm İbrahimov və digər şəxslərlə birlikdə Kəlbəcərin Susuzluq kəndi istiqamətində hərəkətdə olarkən avtomobil tank əleyhinə minaya düşüb. Partlayış nəticəsində Sirac Abışov və Məhərrəm İbrahimov, eləcə də Kəlbəcər Rayon İcra Hakimiyyəti başçısının Susuzluq kənd inzibati ərazi dairəsi üzrə nümayəndəsinin müavini Arif Əliyev şəhid olub, digər şəxslər yaralanıb.
Siracın kamerası həmin gün susdu.
Amma onun çəkdiyi görüntülər, həmkarlarının xatirələri və jurnalist kimi keçdiyi yol yaddaşlarda qaldı.
Şəhid jurnalistin ölümü Azərbaycan mediası üçün də ağır itki oldu. Sirac Abışov və Məhərrəm İbrahimov xidməti vəzifələrini yerinə yetirərkən həyatlarını itirən jurnalistlər kimi Azərbaycanın media tarixində xüsusi yer tutdular. Onların adları Azərbaycan mətbuatının şəhidlərinin xatirəsinə yaradılmış memorial kompleksin anım lövhəsinə də həkk olunub.
Sirac Abışov ölümündən sonra Prezident İlham Əliyevin sərəncamı ilə 3-cü dərəcəli “Vətənə xidmətə görə” ordeni ilə təltif edilib. Onun məzarı Sumqayıt Şəhidlər xiyabanındadır. Sirac ailəli idi, Özgür adlı bir övladı yadigar qalıb.
Bu gün onun doğum günüdür. 37 yaşını qeyd edə bilərdi. Kamera arxasında dayanıb növbəti reportajını çəkə, növbəti kadrı seçə, növbəti hadisəni lentə ala bilərdi. Amma həyatının ən böyük kadrı yarımçıq qaldı. Sirac Abışovun kamerası susdu, özü isə Azərbaycan jurnalistikasının yaddaşında qaldı. Çünki bəzi jurnalistlər yalnız yazdıqları və çəkdikləri ilə deyil, öz həyatları ilə peşələrinin tarixini yazırlar.
