Toyuq əti dünyada ən çox istehlak olunan ət növü olub və onun qlobal populyarlığının yaxın illərdə də artacağı gözlənilir.
Bu barədə Financial Times yazıb. Nəşrin məlumatına görə, 2023-cü ildə dünyada 76,2 milyard toyuq yetişdirilib. 2006-cı ildə isə bu göstərici 48,3 milyard olub.
Toyuq istehsalının artımında əsas pay Asiya-Sakit okean regionunun, daha sonra isə Amerika və Avropanın payına düşür. Çin və ABŞ birlikdə qlobal toyuq ətinə olan tələbatın təxminən üçdə birini formalaşdırır.
Nəşr qeyd edir ki, XX əsrin böyük hissəsində nisbətən bahalı və məhdud istehlak olunan toyuq əti XXI əsrdə dünyanın əsas protein mənbələrindən birinə çevrilib. Ekspertlər isə “toyuq zirvəsi”nin hələ keçilmədiyini düşünürlər.
Toyuq ətinin populyarlığının əsas səbəbləri arasında onun digər ət növləri ilə müqayisədə daha münasib qiyməti, yemə çevirmə səmərəliliyi, sürətli yetişdirilməsi və müxtəlif mətbəxlərə asan uyğunlaşması göstərilir.
Bundan başqa, toyuq əti donuz və mal ətindən fərqli olaraq daha az mədəni və dini məhdudiyyətlə üzləşir. Bu xüsusiyyət onun dünyanın müxtəlif ölkələrində geniş yayılmasına imkan verib.
Financial Times yazır ki, 2022-ci ildə toyuq əti istehsal həcminə görə donuz ətini də geridə qoyub. Son illərdə qlobal toyuq istehsalının artım tempi də sürətlənib.
