İngiltərənin Norfolk bölgəsindəki Trinity Broads Təbiət Qoruğunun rəhbəri Eilish Rothney ofisinə qayıtdıqda gözlənilməz mənzərə ilə qarşılaşıb. Daşıma konteynerindən ofisə çevrilən məkanda yaban arıları kitab rəfini tamamilə örtəcək ölçüdə nəhəng yuva qurub.
ilk olaraq yuvadan xilas olmağı düşünən Rothney daha sonra fikrini dəyişərək arılara toxunmamaq qərarına gəlib. Təxminən iki ay ərzində koloniya böyüyüb və yuva bir metrdən artıq hündürlüyə çataraq kitab rəfinin böyük hissəsini örtüb.
Rothney arıların rahat şəkildə ofisə girib-çıxması üçün pəncərəni açıq saxlayıb. Minlərlə işçi arının ağac liflərini çeynəyərək hazırladığı yuva müxtəlif rənglərdə qat-qat formalaşan böyük bir quruluşa çevrilib. Təbiət qoruğunun rəhbəri isə gündəlik işlərini yuvanın yanında davam etdirib.
Yuvadan gələn davamlı zəif uğultunun minlərlə arının qanadlarını hərəkət etdirərək koloniyanın temperaturunu tənzimləməsi ilə bağlı olduğu düşünülür. Ana arı yumurta qoymağa davam etdiyi halda, işçi arılar çöldən qida gətirərək sürfələri bəsləyir.
Rothney bu qədər böyük koloniyanın ofisdə olmasına baxmayaraq, arıların ona hücum edəcəyindən narahat olmadığını bildirib. Onun sözlərinə görə, sakit davranıldıqda arılar insanı təhlükə kimi qəbul etmirlər.
Lakin qeyri-adi “ofis yoldaşlığı” uzun sürməyəcək. Payızda ana arının yumurta qoymağı dayandırmasından sonra erkək və işçi arıların öləcəyi, yeni ana arıların isə qışı keçirmək üçün yuvadan ayrılacağı gözlənilir. Qış gəldikdə nəhəng yuvanın tamamilə boş qalacağı bildirilir.
Rothney arılar getdikdən sonra yuvanı ehtiyatla açaraq onun içindəki mürəkkəb quruluşu araşdırmağı planlaşdırır.
