İspaniyanın Burqos vilayətində yerləşən kiçik Avellanosa de Muño kəndi 12 avqust 2026-cı ildə baş verəcək tam Günəş tutulması ərəfəsində dünyanın diqqət mərkəzinə çevrilib.
Tam tutulmanın mərkəzi xətti üzərində yerləşən kəndə minlərlə turistin gələcəyi gözlənilir.
12 avqust 2026-cı ildə baş verəcək tam Günəş tutulması 1999-cu ildən bəri materik Avropasından, 1912-ci ildən bəri isə materik İspaniyadan müşahidə olunacaq ilk tam Günəş tutulması olacaq.
Mütəxəssislərin fikrincə, Avellanosa de Muño kəndi tutulmanı izləmək üçün ən əlverişli məkanlardan biridir. Kənddə yüksək binaların olmaması, qərb üfüqünün açıq olması və işıq çirkliliyinin demək olar ki, müşahidə edilməməsi astronomiya həvəskarlarını bu bölgəyə cəlb edir.
Vaxtilə təxminən 200 nəfərin yaşadığı kənddə hazırda daimi əhali çox azdır. Lakin tutulma ilə əlaqədar İspaniyanın müxtəlif bölgələrindən, həmçinin Böyük Britaniya, Fransa, ABŞ və Venesueladan çoxlu sayda turistin və vaxtilə burada yaşamış insanların kəndə gələcəyi gözlənilir.
Bölgədəki hotellərdə yerlərin böyük hissəsi artıq əvvəlcədən bron edilib. Yaxınlıqdakı Lerma şəhərində yerləşən məşhur Parador otelində rezervasiyaların illər öncədən dolduğu bildirilir.
Bu astronomik hadisəni daha da maraqlı edən amillərdən biri odur ki, Günəş tutulması gün batımına yaxın baş verəcək və qısa müddət ərzində iki dəfə alaqaranlıq yaşanacaq.
Bundan əlavə, həmin gecə Perseid meteor yağışını müşahidə etmək də mümkün olacaq. Bu səbəbdən astronomiya həvəskarları üçün 12 avqust gecəsi nadir səma hadisələrinin eyni vaxtda izlənilə biləcəyi xüsusi gün hesab olunur.
