ABŞ Prezidenti Donald Tramp administrasiyası İrana qarşı hərbi əməliyyatların genişləndirilməsi variantlarını müzakirə edir.
Bu barədə "The Wall Street Journal" (WSJ) məlumat yayıb.
Nəşrin yazdığına görə, Tramp Ağ Evdə keçirilən müşavirədə eskalasiyanın üç mümkün ssenarisini müzakirə edib.
Birinci variant İranın əsas neft ixrac mərkəzi hesab olunan Xarq adasının ABŞ qoşunlarının iştirakı ilə ələ keçirilməsini nəzərdə tutur.
İkinci ssenari İranın nüvə proqramı ilə əlaqələndirilən və indiyədək ABŞ tərəfindən hədəfə alınmayan “Piks-Mauntin” yeraltı kompleksinə aviazərbələrin endirilməsidir. Bildirilir ki, qranit süxurların altında təxminən 90–145 metr dərinlikdə yerləşən tunellər mövcud bunker əleyhinə bombalar üçün belə əlçatmaz ola bilər.
Üçüncü variant isə ABŞ-ın hava hücumlarının İranın enerji infrastrukturu obyektlərini də əhatə edəcək şəkildə genişləndirilməsini nəzərdə tutur.
WSJ-nin məlumatına görə, Donald Tramp hələlik bu variantlardan heç biri ilə bağlı yekun qərar verməyib.
