Ukrayna hüquq-mühafizə orqanları ölkədə ciddi rezonans doğuran yeni bir korrupsiya və qanunsuz miqrasiya sxeminin üstünü açıb.
Ukraynanın keçmiş mədəniyyət naziri hərbi çağırış yaşındakı kişilərin qanunsuz yollarla ölkədən qaçmasına şərait yaratdığı üçün rəsmi ittiham (şübhəli şəxs qismində bildiriş) təqdim edilib. İstintaqın materiallarına görə, qaçmaq istəyən şəxslər guya xeyriyyə konsertlərində çıxış edəcək bir musiqi qrupunun üzvləri kimi qeydiyyata alınıb. Lakin Ukrayna Dövlət Sərhəd Xidmətinin əməkdaşları ilkin yoxlama zamanı bu şəxslərin musiqiyə heç bir aidiyyatı olmadığını müəyyən edərək onların ölkədən çıxışına mane olublar.
Buna baxmayaraq, yüksəkvəzifəli dövlət məmuru dərhal hərəkətə keçərək sərhəd xidmətinə təkrar rəsmi məktub ünvanlayıb və həmin şəxslərin məhz "musiqiçi" kimi ölkədən buraxılmasını xahiş edib. Sabiq nazir əvəzinin imzaladığı bu rəsmi sənəd əsasında qondarma musiqiçilərin sərhədi keçməsinə icazə verilib. Nəticədə, hərbi xidmətdən yayınan 8 nəfər Ukrayna ərazisini tərk edib və geri qayıtmayıb.
Qeyd olunur ki, hüquq-mühafizə orqanları cinayət sxeminin digər mümkün epizodlarını və bu işdə əli olan digər şəxsləri müəyyənləşdirmək üçün genişmiqyaslı istintaq tədbirlərini davam etdirir. Hazırda istintaqın maraqları naminə sabiq nazir əvəzinin adı mətbuata açıqlanmır.
