Milli Məclisin sabiq deputatı, Naftalan şəhər icra hakimiyyətinin sabiq başçısı, məşhur YAP üzvü Musa Musayev Musavat.com-a müsahibə verib. Musa Musayevin budəfəki müsahibəsi də ilginc açıqlamalarla zəngindir.
Müsahibəni təqdim edirik:
- Musa müəllim, yəqin ki, zamanında aktiv deputat kimi ictimai yaddaşlarda qalan bir siyasi persona olaraq, bu gün Sizin hansı fəaliyyətlə məşğul olduğunuzu bilmək oxucular üçün də maraqlı olardı...
-YAP-ın 1-ci Qurultayından (Dekabr 1999 ) 7-ci Qurultayına qədər YAP Siyasi Şurasının üzvü kimi də fəaliyyət göstərmişəm. 5 mart 2021-ci ildə 7-ci Qurultayda Siyasi Şura ləğv edildiyi üçün YAP Təftiş Komissiyasının üzvü seçildim və Partiyada öz fəaliyyətimi davam etdirirəm. 2 avqust 2021-ci ildən MSK 20 saylı Nərimanov ikinci seçki dairəsi Dairə Seçki Komissiyasının sədriyəm. Eyni zamanda 2022-ci ildən Qərbi Azərbaycan İcması Ziyalılar Şurasının üzvü kimi də fəaliyyət göstərirəm. Ümumən götürəndə mən 1987-ci ildən bu günə qədər siyasi fəaliyyətlə məşğulam. Sosial şəbəkələrdə də fəallıq göstərirəm. Televiziya kanallarında və mətbuatda da lazım gələndə çıxışlar edirəm.
- Milli Məclisin üzvü olmaqla yanaşı, bir müddət Naftalan Şəhər İcra Hakimiyyətinin başçısı vəzifəsində işlədiniz. Deputatlıq, yoxsa icra başçısı vəzifəsi daha çox məsuliyyətli vəzifədir?
-2000-2005-ci illərdə Milli Məclisin YAP-ın proporsional siyahısında 15-ci yerdə millət vəkili seçilmişəm. Deputatlıq dövründə YAP-ın ən fəal deputatlarından biri olmuşam. 2006-2010-cu illərdə də cənab Prezident İlham Heydər oğlu Əliyevin Sərəncamı ilə Naftalan şəhərinin İcra Hakimiyyətinin başçısı təyin olunmuşam. Bu dövrdə də Naftalan kurort şəhərinin inkişafı və quruculuğu istiqamətində müəyyən işlər görmüşəm. Deputatlıq da, icra başçısı olmaq da hər ikisi böyük məsuliyyət tələb edir. Millət vəkili kimi seçicilərin etimadını doğrultmalısan. Proporsional siyahıdan millət vəkili seçilmək ikiqat məsuliyyət tələb edir. Çünki o zaman bütün Azərbaycan seçicilərinin deputatı sayılırsan. Şəhər İcra Hakimiyyətinə başçı vəzifəsinə cənab Prezident təyin edir. Deməli, təyin olunan məsuliyyətini dərk edərək Prezidentin göstərdiyi etimadı çalışıb doğrultmalıdır. Mən məsələyə həmişə bu cür yanaşmışam. Həm də əhaliyə şərəflə, ləyaqətlə xidmət etməlisən ki, onların da etimadını qazana biləsən. Deməli, hər iki vəzifə məsuliyyətlidir mənim üçün.
-Deputat olduğunuz dönəmlərdə qatı Əliyevçi olmağınızla yanaşı həm də tənqidçi millət vəkili kimi tanınırdınız. Tənqidlərinizin hədəfi təkcə müxalifət deyildi, eyni zamanda bəzi məmurları da sərt tənqid edirdiniz, hətta məmurların sırasında xainlərin olduğunu da deyirdiniz. Dediklərinizin illər keçdikcə təsdiqini tapmasını necə qarşılayırsınız?
-Təkcə deputat olduğum dövrdə deyil, 1987-ci ildə Heydər Əliyev SSRİ Nazirlər Sovetinin sədrinin 1-ci müavini vəzifəsindən və Siyasi Büro üzvlüyündən ədalətsizcəsinə kənarlaşdırıldığı gündən Heydər Əliyevin müdafiəsinə qalxmışam. O dövrdən qatı Heydər Əliyevçiyəm və ömrümün axırınadək belə də olacaq, Ulu Öndərin yolunu şərəflə davam etdirən cənab Prezidentimiz İlham Heydəroğlunun yanında olacağam. Bəli, həm müxalifəti, həm də iqtidarda olan bəzi yaramaz məmurları da haqlı olaraq tənqid etmişəm və peşman da deyiləm. Onu da qeyd edim ki, iqtidar və müxalifət qəzetlərini də sərt tənqid etmişəm. Mənim tənqid hədəfimdə müxalifətdən ən çox Əli Kərimli, iqtidardan da Ramiz Mehdiyev və onun ətrafı olub. Onun da əziyyətini çəkdim. 2005-ci ilin noyabr parlament seçkilərində namizədliyim YAP tərəfindən verilsə də, Binəqədi rayonu 8-ci dairədən deputat seçilməyimə həmin insanlar mane oldular, indi axtarışda olan cinayətkar Elşad Abdullayevi dəstəklədilər. O dövrdə xain adlandırdığım məmurlar barədə dediklərim gec də olsa öz təsdiqini tapdı. Məmurlarla bərabər YAP-dan seçilən deputatları da tənqid etmişəm. Çünki o dövrdə mövqe bildirməyən, gözləmə mövqeyində olan, susqun deputatlara da öz iradımı bildirirdim. İstənilən millət vəkili parlamentdə fəal olmalıdır, ortaya mövqe qoymalıdır, seçicisinin probleminə biganə qalmamalıdır, partiyasının mövqeyini dəstəkləməlidir. 2000 - 2005-ci illərdə parlamentdə dediyim fikirlər öz təsdiqini tapdığı üçün məmnunam.
-Sosial şəbəkədə kifayət qədər aktivsiniz. Fikirlərinizi açıq şəkildə yazmaqdan çəkinmədiyiniz aydın görünür. Hətta bugünlərdə yazmısınız ki, hələ də Ramiz Mehdiyevdən qorxanlar və ona qibtə edənlər var. Qorxanlar kimlərdir, onların sırasında hazırda vəzifədə olanlar da varmı? Hazırda heç bir vəzifəsi olmayan, ev dustaqlığında yaşayan yaşlı insandan qorxmağa əsas varmı?
- Kişisənsə nədənsə, kimdənsə çəkinmək və yaxud qorxmaq nə deməkdir?! Bu tip hallar mənə yaddır. Ramiz Mehdiyevlə bağlı zamanında öz mövqeyimi bildirmişəm. Dəfələrlə demişəm, bir daha deyirəm, yıxılana balta vurmaq, vəzifəyə gələni də tərifləmək xarakterimə uyğun gəlmir. Bəli, bu gün də Ramiz Mehdiyev barədə danışmağa, yazmağa cəsarəti çatmayan vəzifəli şəxslər, deputatlar və keçmiş məmurlar var. Niyəsi də odur ki, bu insanlar vaxtilə Ramiz Mehdiyevin “şinelinden” çıxıblar və onun xeyir-duası ilə vəzifə kürsüsünə qalxıblar. Bu da məncə səbəbdir və qəbul olunandır. Hər kəs özünə cavabdehdir, o cümlədən də mən. Yaşayaq görək sonluq necə qurtaracaq.
-Hazırkı Milli Məclisin fəaliyyətini izləyirsinizmi? Görmək istədiyiniz kimidir, yoxsa...
-Milli Məclisin fəaliyyəti qənaətbəxşdir. Dövrün, zamanın tələbinə cavab verən qanunlar qəbul edirlər, xarici dövlətlərə tez-tez səfərlər olur, görüşlər keçirilir və sairə.
Məni qane etməyən bir şey var, televiziya kanallarına az sayda deputatlar çıxıb, çıxışlar edirlər. Bəzən bir deputat hər şeydən danışır-müharibədən, Zəngəzur dəhlizindən, memarlıqdan, iqtisadiyyatdan, sənayedən, texnologiyadan, sudan, ekologiyadan, jurnalistikadan, səhiyyədən və sairə. Məncə hərə öz ixtisasına və sahəsinə uyğun mövzudan danışsa daha yaxşı olar. Bunun da səbəbi odur ki, aktiv və passiv deputatlar var. Bəzən mənə də müraciətlər olur, deyirəm ki, deputatları çağırın, çıxış etsinlər. Cavab verirlər ki, çağırırıq, gəlmirlər. Bu, yaxşı hal deyil. Deputatları daha fəal görmək istərdim.
