Türkiyənin Milliyətçi Hərəkat Partiyasının (MHP) sədri Dövlət Bağçalı Şimali Kiprdə keçirilən prezident seçkilərinə münasibət bildirib.
O, seçkilərin nəticələrinə şübhə ilə yanaşıb.
Bağçalı bildirib ki, Şimali Kiprdə baş tutan seçkidə seçici aktivliyi çox aşağı olub.
"Kipr türk icmasının taleyini bu aktivliklə təmsil etmək olmaz. Seçkilərin nəticələri seçki heyəti tərəfindən açıqlansa belə, Şimali Kipr parlamenti təcili toplanmalı, seçki nəticələrinin və federasiyaya qayıtmağın qəbuledilməz olduğunu bəyan etməli və Türkiyə Cümhuriyyətinin tərkibinə daxil olmağa qərar verməlidir", - o qeyd edib.
Xatırladaq ki, prezident seçkilərində federasiya tərəfdarı olan Tufan Erhürman qalib gəlib.
