Azərbaycanda ötən il 78 mindən artıq qadın aborta məruz qalıb. Statistikaya əsasən, abort etdirən qadınların yarısının gənc (15-29 yaş) olduğu məlum olub.
Həmçinin onlardan 2700-dən çoxunun yaşı 20-dən az olub. Əlavə olaraq, 15-17 yaşında olan 72 qadın, 18-19 yaşında olan 2679 qadın abort etdirib.
Mövcud statistikalar göstərir ki, hər ötən il abortla bağlı göstəricilərdə artım müşahidə olunur.
"Təmiz Dünya" Qadınlara Yardım İctimai Birliyinin təsisçisi və sədri Mehriban Zeynalova abortların artmasının səbəbini bir neçə mühüm sosial və psixoloji səbəblərlə əlaqələndirib.
Onun sözlərinə görə, bəzi hallarda bu, münasibətlərdə qarşılıqlı anlaşmazlıqdan və ya sosial-iqtisadi çətinliklərdən qaynaqlanır:
“Gənclər bəzən düşünürlər ki, uşaq bu mərhələdə onların həyatına travma gətirə bilər. Bu qərarı sağlam düşüncə ilə qəbul edənlər, daha çox uşağın gələcəyini və onun üçün yaradılacaq şəraiti nəzərə alırlar.
Cəmiyyətdə aborta qarşı mənfi münasibət olsa da, bəzi hallarda bu addım gələcəkdə yaşana biləcək konfliktlərin qarşısını almaq üçün atılır. Digər hallarda isə qeyri-rəsmi münasibətlərdə hamiləlik baş verir, lakin qarşı tərəf məsuliyyəti üzərinə götürmək istəmir, atalıq haqqını tanımır. Bu kimi vəziyyətlərdə də abort qərarı verilə bilir”.
Həmsöhbətimiz həmçinin vurğulayıb ki, ən düzgün yanaşmanın gənclərin münasibətə başlamazdan əvvəl tələsməməsi, bir-birlərini daha yaxından tanımaları, qarşı tərəfin valideynlik məsuliyyətini dərk edib-etmədiyinə diqqət etmələridir:
“Sevgi mərhələsində bəzi siqnalları görmək çətin olsa da, zamanla şəxsin əsl xarakteri, düşüncə tərzi, məsələn, patriarxal yanaşması üzə çıxa bilər. Bu da münasibətlərdə gərginliklərə səbəb ola bilər.
Evlilikdən öncə gənclər bir-birlərini daha dərindən tanımalı və yalnız bundan sonra ailə qurmaq qərarı verməlidirlər. Uşaq dünyaya gətirməzdən əvvəl isə valideynlik məsuliyyəti haqqında maarifləndirici təlimlərdən keçmək faydalı olardı. Bundan əlavə, münasibətlərdə qarşılıqlı anlayışın olub-olmaması, gələcəkdə uşağa necə qayğı göstəriləcəyi, uşağın hüquqi statusu və sosial təminatı kimi məsələlər də öncədən nəzərdən keçirilməlidir”.
M.Zeynalova eyni zamanda bildirib ki, sosial-iqtisadi amillər də bu qərarlara təsir göstərir:
“Bəzən gənc ailələr bir uşaqdan sonra ikinci uşağı dünyaya gətirməkdən çəkinirlər, çünki uşağın saxlanılması və ehtiyaclarının qarşılanması ciddi məsuliyyət və maliyyə tələb edir.
Ən yaxşı halda uşaq üçün münbit və sabit bir mühit yaradıldıqdan sonra valideyn olmaq daha doğrudur. Çünki hamiləlik özü də qadının sağlamlığına müəyyən təsirlər göstərir”.
Müsahibimiz onu da əlavə edib ki, hər abort qadın orqanizmində fəsadlar yarada bilər:
“Bu səbəbdən də gənclər müasir dövrün təklif etdiyi tibbi vasitələrdən, dərman preparatlarından və planlaşdırılmış hamiləlik imkanlarından istifadə etməlidirlər”.
