Azərbaycanda gündəlik yoluxanların sayında kəskin azalma müşahidə olunur. Belə ki, artıq yoluxma sayı 4000-dən 100-200-ə düşüb. Gündəlik yoluxma sayı azaldığına görə fevralın 1-dən ibtidai siniflər üçün 1-4-cü siniflər üzrə əyani təhsil Bakı, Sumqayıt və Abşeronda həftədə 3 dəfə olmaqla, digər bölgələrdə isə həftədə 4-5 dəfə bərpa olunmasına qərar verilib. İki həftə ərzində də ali təhsil və yuxarı siniflər üçün ənənəvi təhsilin qismən bərpa edilməsi gözlənilir. Qeyd edək ki, yanvarın 18-dən ölkə ərazisində koronavirus əleyhinə peyvəndlənmə də başlanılıb. Bu gün hər kəsi maraqlandıran sual marta qədər ali və orta məktəblərdə tam ənənəvi təhsilin nə zamandan bərpa edilməsidir.RegionTV.info xəbər verir ki, Bununla bağlı Sonxeber.az-ın sualını cavablandıran deputat Ceyhun Məmmədov bildirib ki, bu barədə yanvarın 22-də keçirilən Təhsil Nazirliyinin brifinqində məlumat verilib:
"Brifinqdə müəyyən məsələlərə aydınlıq gətirildi. Sonrakı dövrdə isə Ali məktəblərlə bağlı müəyyən qərarların qəbul edilməsi gözlənilir. Tam ənənəvi təhsilin bərpası gündəlik yoluxma sayının artma və azalma dinamikasından asılıdır. Əgər yoluxma sayında istənilən nəticə əldə edilməsə, bu proses bir müddət davam edəcək və biz ənənəvi təhsilə qayıda bilməycəyik. Amma marta qədər yoluxma sayında azalma dinamikası davam edərsə və istənilən nəticə əldə edilərsə biz ənənəvi təhsilə qayıdacağıq. Bu məsələdə, insanlarımızın məsuliyyətli olub, Operativ Qərargah tərəfindən qoyulan qaydalara əməl etməsindən çox şey asılı olacaq. Virusun daha çox yayılmaması üçün bütün imkanlarımızı səfərbər etməliyik. Bu təhlükə hələ dünyanın üzərindən sovuşmayıb. Qərarlar da ümumi yoluxma sayından asılı olaraq qəbul ediləcək".
