Finlandiyanın telekommunikasiya avadanlığı istehsalçısı "Nokia" gəlirliliyi artırmaq proqramı çərçivəsində 14 minə qədər işçini ixtisar etməyi planlaşdırdığını açıqlayıb.
Şirkət rəhbərliyi bunu zəif bazar şəraitində xərclərin azaldılması və səmərəliliyin artırılması zərurəti ilə izah edib.
"Nokia" ixtisarların miqyasının "satış bazarlarındakı tələb vəziyyətindən" asılı olacağını, lakin tələbin sürətli bərpasını gözləmədiklərini qeyd edib. Hazırda 86 min insanın çalışdığı şirkət ixtisarların kadr xərclərini 10-15% azaldacağını və 2024-cü ildə ən azı 400 milyon avroya, 2026-cı ilin sonuna isə 800 milyon avrodan 1.2 milyard avroya qədər qənaətə gətirib çıxaracağını gözləyir.
İstehsalçı üçüncü rübün maliyyə nəticələri ilə eyni vaxtda gəlirliliyin artırılması proqramının işə salınması və bununla bağlı azalmalar haqqında bəyanat dərc edib. Hesabat dövründə xalis satışlar illik müqayisədə 20% azalaraq 4.98 milyard avroya düşüb.
Mənfəət 69% azalaraq 133 milyon avroya, əməliyyat marjası isə 8.3%-dən 4.8%-ə düşüb. Buna baxmayaraq, "Nokia" illik nəticələrlə bağlı proqnozlarını təsdiqləyib. Şirkət xalis satışların 23.2–24.6 milyard avro və əməliyyat marjasının 11.5–13% olacağını gözləyir. Helsinki birjasında "Nokia"nın səhmləri şirkətin xəbərlərinə reaksiya olaraq təqribən 4% ucuzlaşıb. İlin əvvəlindən 30% itirilib.
