Prezident İlham Əliyevin sərəncamı ilə Rəcəb Zakir oğlu Rəhimli Naxçıvan Muxtar Respublikası Ordubad Rayon İcra Hakimiyyətinin başçısı təyin edilib.
Rəcəb Rəhimlinin dosyesini təqdim edirik:
Rəcəb Rəhimli bakalavr təhsilini ödənişsiz əsaslarla Türkiyə Respublikasının Qazi Universitetinin İqtisadiyyat və İdarəetmə Elmləri Fakültəsi – “Dövlət İdarəçiliyi” ixtisası üzrə alıb. O, magistratura (Dövlət xətti ilə) təhsilini də həmin ixtisas üzrə eyni universitetdə davam etdirib. Doktorantura təhsilini isə Ankara Universiteti Siyasət Elmləri Fakültəsi – “Siyasət elmi və dövlət idarəçiliyi” ixtisası üzrə alıb.
Dövlət idarəçiliyi, idarəetmədə və dövlət idarəçiliyində innovasiyalar, dövlət qulluğu, dövlət qulluğunda etik normalar, dövlət qulluqçularının xidməti fəaliyyətinin qiymətləndirilməsi, stratejik idarəetmə, yerli özünüidarəetmə, insan resurslarının idarəedilməsi, siyasi, sosial-iqtisadi və enerji təhlükəsizliyi problemləri, korrupsiya problemi və onun aradan qaldırılma yolları, regional konfliktlər kimi sahələri tədqiq edib.
Rəcəb Rəhimli Prezident yanında Dövlət İdarəçilik Akademiyasının Dövlət qulluğu və kadr siyasəti kafedrasının müdiridir.
O, siyasi elmlər üzrə fəlsəfə doktoru, dosentdir.
