Martın 27-də gecə Qüdsdə Knesset (parlament) binası yaxınlığında İsrailin Baş naziri Binyamin Netanyahunun siyasətinə qarşı kortəbii nümayişlər keçirilib.
RegionTV.info xəbər verir ki, bu barədə “Yedioth Ahronoth” qəzeti yazıb.
Bildirilib ki, etiraz aksiyasında minlərlə insan iştirak edir. Onların bir çoxu Netanyahunun iqamətgahı qarşısında daha əvvəl keçirilən nümayişdən sonra parlament binasına gəlib, nümayiş zamanı polis izdihamı dağıtmaq üçün su şırnaqlarından istifadə edib.
Eyni zamanda, yerli 13-cü kanal Təl-Əvivdə kütləvi etiraz aksiyalarında 100 mindən çox insanın iştirak etdiyini bildirib.
Aksiya bazar günü axşam saatlarında etirazçıların bağladıqları şəhərin şərqində əsas magistral olan Ayalon şossesində keçirilib. Kanalın istinad etdiyi “Crowd Solutions” özəl şirkətinin hesablamalarına görə, etirazçıların ən çox cəmləşdiyi ərazidə 105 minə yaxın insan olub.
Telekanal xəbər verir ki, saatın gec olmasına baxmayaraq, nümayişçilər yolu bağlamağa, tonqal qalamağa, baraban vurmağa, siyasi şüarlar səsləndirməyə və dağılışmaqdan imtina etməyə davam edir. Polis baş verənlərə qarışmır.
Xatırladaq ki, İsraildə martın 26-da axşam saatlarında başlayan kortəbii etirazların səbəbi Netanyahunun elan etdiyi ölkənin müdafiə naziri Yoav Qalantın istefası olub. O, bu qərarı bir gün öncə Qalant açıq şəkildə hakim koalisiyanın irəli sürdüyü və müxalifətin kütləvi etirazına səbəb olan məhkəmə islahatlarının dayandırılmasının tərəfdarı olduğunu deyib.
Hökumətin əleyhdarlarının fikrincə, Ali Məhkəmənin səlahiyyətlərinin məhdudlaşdırılması və hakimlərin seçiminə icra hakimiyyətinə nəzarətin verilməsini nəzərdə tutan islahat İsrail dövlətçiliyinin demokratik əsaslarını sarsıdacaq. Netanyahu israr edir ki, bu islahat hakimiyyətin bütün qollarının səlahiyyətlərini balanslaşdıracaq və ölkənin siyasi sistemini daha demokratik edəcək.
