“20 yanvar Azərbaycan xalqının faciəsi ilə bərabər, həm də unudulmaz qəhrəmanlıq tarixidir. Müstəqilliyimiz təmin olunması, torpaqlarımızın azadlığı uğrunda həyatlarını qurban verənlərin qəhrəmanlığı, vətən sevgisi bugünkü xoşbəxt gələcəyimizin, inkişafımızın təməlidir”.
RegionTV.info-nun xəbərinə görə, bunu deputat Tahir Rzayev bildirib.
“Ulu Öndərimiz Heydər Əliyevin keçdiyi mübarizə yollarına nəzər saldıqda, müstəqilliyimizin bərpa olunmasında, möhkləmləndirilməsində göstərdiyi fədakarlıqları göz önünə gətirəndə uğurlarımızın böyük çətinliklər bahasına qazanıldığı aydın görünür. 20 yanvar faciəsindən bir gün sonra Azərbaycanın Moskvadakı nümayəndəliyinə gedib Mixail Qorbaçovun antiazərbaycan siyasətini kəskin tənqid etmək, xalqımızın başına gətirilən bəlalarda bu ermənipərəst dövlət rəhbərini günahlandırmaq və bunu dünyaya bəyan etmək böyük cəsarət, vətənpərvərlik tələb edirdi. Bu addımı yalnız daimi xalqı ilə bir olan, həyatını torpağı və vətəni üçün qurban verməkdən çəkinməyən bir lider - Heydər Əliyev ata bilərdi. Ümummilli Liderimizin unudulmayan hərəkəti, amalı o vaxtlar matəm içərisində olan Azərbaycan xalqına yeni mübarizə ruhu verdi. Tankların, avtomat silahların qarşısına inam, qətiyyət dolu canları ilə çıxan şəhidlərimizin övladları, əzizləri müstəqillik uğrunda mübarizəyə daha cəsarətlə, həvəslə atıldılar. Bu bir həqiqətdir və təkzibolunmaz faktdır ki, birinci və ikinci Qarabağ müharibəsində döyüşə atılan, qəhrəmanlıq göstərən, canlarını fəda edən insanların hər biri 20 yanvar faciəsində həlak olanlardan, şücaət göstərənlərdən nümunə götürmüşlər, günahsız qardaş və bacılarının qanlarının yerdə qalmaması uğrunda döyüşə atılmış, düşmənlərimizin bağrına od qoymuşlar. 20 yanvar xalqımız üçün bir qəhrəmanlıq nümunəsi, həm də ibrət dərsidir. Xalqımız bu dərsdən düzgün nəticə çıxartmışdır. İndi ölkəmizdə ictimai - siyasi sabitlikdir, dövlətimiz inkişaf yolundadır, dünyada böyük nüfuza malikdir. Xalq və Prezident birdir, yekdildir, həmrəydir. Azərbaycan Respublikasının Prezidenti cənab İlham Əliyevin düşünülmüş siyasəti Azərbaycanı sosial, dünyada öz yeri və mövqeyi olan, tanınan, sevilən hörmət göstərilən, inkişaf edən, gündən - günə çiçəklənən, qalib bir dövlətə çevrilmişdir. 30 il düşmən işğal altında olan torpaqlarımı azaddır. İndi dünya Azərbaycan həqiqətlərindən, uğurlarından, sülhsevərliyindən söz açır, xalqımız özünün milli - mənəvi dəyərləri, torpağa, vətənə sadiqliyi ilə tarixə yeni, unudulmaz səhifələr yazır. Sözsüz ki, 20 yanvar şəhidlərinin ruhu da bunu görüb sevinir, şad olur. Onlar bu xoşbəxt həyatımıza zəmin hazırladıqları, yollar açdıqları üçün qürur duyurlar və qürur duymaqda haqlıdılar. Xalqımızın fəxr etdiyi şəhidlərimiz unudulmaz və ölməzdilər. Onlar ən böyük hörmət və ehtirama layiqdilər”, - deputat qeyd edib.
