Rusiya prezidenti Vladimir Putin ilk dəfə olaraq “Qəhrəman ana” fəxri adının verilməsi haqqında fərman imzalayıb.
Bazar ertəsi dərc edilən sənədə əsasən, iki nəfərə “Qəhrəman ana” fəxri adı verilib - Medni Kadırova və Olqa Dextyarenkoya.
Medni Kadırova Çeçenistan lideri Ramzan Kadırovun həyat yoldaşıdır.
Olqa Dextyarenko isə Rusiyadakı Yamalo-Nenets Muxtar Dairəsinin sakinidir.
Onlar “Ailə institutunun möhkəmləndirilməsində və uşaqların tərbiyəsində böyük xidmətlərinə görə” bu ada layiq görülüblər.
Rusiyada "Qəhrəman ana" fəxri adının verilməsi barədə qərar 2022-ci ilin avqustunda qəbul edilib.
"Qəhrəman ana" adı 10 və ya daha çox uşaq dünyaya gətirən və böyüdən qadınlar üçün ən yüksək fərqlənmə dərəcəsi hesab olunur.
Çeçenistan lideri Ramzan Kadırovun həyat yoldaşı Medni Kadırova 12 övlad anasıdır - 7 qız, 5 oğlan.
Medni Kadırova Axmat Kadırov adına İctimai Fondun vitse-prezidenti və Çeçenistan rəhbərinin katibliyinin rəhbərinin müavinidir. Fondun prezidenti Ramzan Kadırovun anası Aymani Kadırovadır.
Fondun saytında respublika rəhbərinin 14 övladının olduğu bildirilir. Bunlardan 12-sini Kadırovun həyat yoldaşı dünayaya gətirib, 2-sini isə övladlığa götürüblər. Övladlığa götürülənlərin hər ikisi oğlandır.
