"Oyunçularımı təbrik edirəm. Belə gərgin vəziyyətdə oynamaq asan deyil. Gələcəyə ümidlə baxırıq".
Bu sözləri "Olimpiakos"un baş məşqçisi Miçel Qonsales UEFA Avropa Liqasının qrup mərhələsinin 4-cü turunda Bakıda "Qarabağ"la keçirilən oyundan sonra mətbuat konfransında deyib.
Baş məşqçi qolsuz başa çatan matçı belə şərh edib: "Məşqlərə başlayanda 3 mərkəz müdafiəçisi ilə oynamaq fikrimiz yox idi. Sadəcə, oyun belə başladı. Amma sonradan sistemi dəyişdik. Gördük ki, belə daha yaxşı oynayırıq. Sistemi dəyişdikdən sonra komandanın daha yaxşı oynaması gələcək üçün ümid verdi".
İspaniyalı mütəxəssis Tofiq Bəhramov adına Respublika stadionundakı atmosferi bəyəndiyini bildirib: "Stadion dolu olanda bundan zövq alıram. "Qarabağ" yaxşı, baxımlı futbol oynayır. Azarkeşlər də onlara dəstək olurdu. Yəqin ki, fanatlar razı qaldılar".
Miçel Yunanıstanda "Qarabağ"a 0:3 hesabı ilə uduzduqları matçı xatırlayaraq deyib: "Oradakı nəticə bizim üçün amansız oldu. Məğlubiyyətə layiq deyildik. Oyunun əsas hissəsində dominant tərəf idik. İki oyunu müqayisə etsək, ilk matçdakı hər səhv qol buraxmağımızla nəticələndi. Hücumda bir çox alternativi olan, bir-birinə uyğunlaşmış futbolçulardan ibarət komandaya qarşı oynamışdıq. Onlardan topu almaq və dominantlıq etmək heç də asan deyildi".
Qeyd edək ki, bu gün Bakıda keçirilən “Qarabağ” - “Olimpiakos” oyunu qolsuz heç-heçə ilə başa çatıb.
