“Təsəvvür edə bilmərəm ki, Qarabağda Ermənistan valyutası işlənilsin, oradakı müəssisələr işğalçı ölkə tərəfindən maliyyələşdirilsin...”
Məlum 10 Noyabr razılaşmasına əsasən Rusiya sülhməramlı qüvvələrinin Qarabağda, o cümlədən dünən – dekabrın 1-də azad edilmiş Laçın rayonunun mərkəzi və Şuşa rayonunadək “dəhliz” adlanan hissədə də yerləşdirilməsinin 44 günlük müzəffər savaşımızdan sonra yaranmış mövcud yeni geo-siyasi reallıqda bir sıra müsbət tərəfləri olsa da, ilk baxışdan xırda görünən, lakin gələcək perspektivdə təhlükə anonsu kimi nəzərə çarpan bəzi məqamlar da var...
Öncədən xəbər verdiyimiz kimi, Rusiya Fövqəladə Hallar Nazirliyinin əməliyyat qrupu Azərbaycan Respublikasının 28 ildən çoxdur Ermənistan işğalı altında qalan “İvanyan” adlandırılmış Xocalı şəhərindəki bir məktəbin bərpasına başlayıb. Bu haqda noyabrın 29-da Rusiya FHN-in rəsmi saytında məlumat yayılıb. Məhz bundan bir gün öncə - noyabrın 28-də Qarabağdakı sülhməramlıların, o cümlədən Rusiya FHN-in canlı qüvvə və yük daşımalarının Azərbaycan Respublikası ərazisi vasitəsilə həyata keçirilməsinə başlanıb. Rusiyadan Dağıstan istiqamətindən ölkəmizə dəmir yolu vasitəsilə daxil olan hərbi qulluqçular, avtomobil və xüsusi texnika, o cümlədən digər maddi-texniki təminat vasitələri müvafiq qaydada sərhəd və gömrük nəzarətindən keçib. Bərdə dəmiryol stansiyasında boşaldılan canlı qüvvə və yüklər avtomobillərlə müvafiq qaydada təyinat nöqtəsinə - yəni ermənilərin hələ də yaşadığı keçmiş Dağlıq Qarabağa, Xankəndinə, yaxud Əsgərana, Xocalıya çatdırılıb. Politoloq kimi tanınan bir çoxları daşımaların Azərbaycan vasitəsilə həyata keçirilməsini Rusiyanın ölkəmizin ərazi bütövlüyünə və suverenliyinə hörmətinin növbəti nümunəsi kimi dəyərləndirirlər... Amma sual verən yoxdur: Bəs Azərbaycanın dövlət sərhədindən, Bakıdan, Kürdəmirdən, Yevlaxdan, Bərdədən, Ağdamdan keçən sülhməramlı adlananların canlı qüvvə və yüklərinin Xocalıda və ermənilərin digər qanunsuz məskunlaşdığı məntəqələrimizdə onların məktəblərinin, infrastrukturlarının bərpasına xidməti də ərazi bütövlüyümüzə və suverenliyimizə hörmətin nümunəsidir?..
Mövzu ilə bağlı Moderator.az-a açıqlama verən keçmiş Xarici İşlər Naziri Tofiq Zülfüqarov məsələni qısaca şərh edib.
“Bəlkə məlumatları bir az da dəqiqləşdirmək lazımdır. İnanmıram ki, Rusiya hökuməti tərəfindən belə bir məlumat yayılsın. Çox güman ki, bu, ermənilər tərəfindən yayılıb(Həmsöhbətimizə xatırlatdıq ki, bəhs edilən informasiya məhz Rusiya FHN-in rəsmi saytında yayılıb. Və noyabrın 10-dan bəri Azərbaycanın rəsmi dövlət xəritəsindəki toponimlərinin əsl adlarının Rusiya qurumları, o cümlədən MN tərəfindən təhrif olunması ilk hal deyil. Məsələn, Xankəndi əvəzinə “Stepanakert”, Ağdərə əvəzinə “Mardakert” və s.)...
Yenə də hesab edirəm ki, bu, yanlış davranış olub. Çünki 10 Noyabr bəyanatında Rusiya sülhməramlı kontingentinin dislpokasiya olunacaqları ərazidəki hüquq və vəzifələri müəyyənləşib. Və ona da inanmıram ki, bundan sonra da ermənilər Xocalı kimi qanunsuz məskunlaşdıqları məntəqələrimizdə yaşamağa davam etsinlər. Düzdü, düşmən və havadarları belə cəhdlər göstərirlər. Amma artıq Laçın da azad olunandan sonra biz bundan sonrakı aktual məsələlər haqda düşünməliyik. Birincisi, Qarabağdakı qeyri-qanuni erməni birləşmələrinin tərksilah olunması, ikincisi Qarabağın ermənilərin Azərbaycan vətəndaşı kimi qalıb yaşayacağı hissəsinin iqtisadi-maliyyə baxımından respublikamıza, dövlətimizə bağlanılması. Şəxsən təsəvvür edə bilmərəm ki, Qarabağda Ermənistan valyutası işlənilsin, oradakı hansısa müəssisələr işğalçı ölkə tərəfindən maliyyələşdirilsin. Bütün bunlar böyük proseslərdir. Düzdü, sadaladağınız toponimlərimizin təhrifi-filan kimi məsələlər bizləri qıcıqlandırır. Belə addımlara qarşı biz hazır olmalıyıq. Və inanmıram ki, bununla Rusiya bölgədə işğal zamanı yaranmış demoqrafik vəziyyəti qoruyub-saxlamağa çalışsın. Odur ki, biz məsələlərə təmkinlə yanaşmalıyıq. Sözsüz ki, biz ardıcıl şəkildə Qarabağın bütün ərazisində, o cümlədən Xocalıda bir dövlət kimi suverenliyimizi və bütün digər hüquqlarımızı bərpa edəcəyik. Buna heç kəsin şübhəsi olmasın...”- deyə sabiq nazir vurğulayıb.
