Bu gün Vətən Müharibəsi Qəhrəmanı, şəhid polkovnik-leytenant Zaur Hüseynoğlunun anım günü keçirilib. Tədbirdə millət vəkili Aqil Məmmədov, Kəlbəcər rayon İH müavini Eldəniz Mehdiyev, şəhidin ailə üzvləri, rayon ictimayyətinin nümayəndələri və digər ictimai xadimlər iştirak ediblər.
Anım mərasimində şəhidin ailə üzvləri, yaxınları və ictimaiyyət nümayəndələri polkovnik-leytenant Zaur Hüseynoğlunun vətənpərvərliyindən, keçdiyi döyüş yolundan, göstərdiyi qəhrəmanlıq və şücaət nümunələrindən danışıblar.Azərbaycanın ərazi bütövlüyünün bərpa edilməsində xüsusi xidmətlərinə və işğal olunmuş ərazilərin azad olunması zamanı düşmənin məhv edilməsi üzrə qarşıya qoyulmuş döyüş tapşırığını yerinə yetirən zaman göstərdiyi qəhrəmanlıq nümunəsinə görə, həmçinin hərbi qulluq vəzifəsini yerinə yetirən zamanı igidliyin və mərdliyin nümayiş etdirilməsinə görə Azərbaycan Prezidenti İlham Əliyevin 09.12.2020-ci il tarixli Sərəncamına əsasən Zaur Hüseynoğlu Cəfərov "Vətənə xidmətə görə”, “Suqovuşanın azad edilməsi uğrunda” “ Hərbi xidmətə görə" medalları ilə təltif olunub.
Millət vəkili Aqil Məmmədov tədbir iştirakçıları ilə birgə şəhidin məzarını ziyarət etdikdən sonra medalları şəhidin atasına təqdim edib.
Bildirək ki, Azərbaycan Ordusunun polkovnik-leytenantı olan Zaur Hüseynoğlu 2020-ci il sentyabrın 27-dən etibarən başlanan Vətən Müharibəsi zamanı Suqovuşanın və Ağdərənin azadlığı uğrunda gedən döyüşlərdə iştirak edib. Polkovnik-leytenant 2020-ci il oktyabrın 9-dan 10-a keçən gecə Ağdərə istiqamətində gedən şiddətli döyüşlər zamanı Ermənistan Silahlı Qüvvələrinin hücum cəhdinin qarşısını alarkən sərəncamında olan minik avtomobili ilə minaya düşərək şəhid olmuşdur. 19 oktyabr tarixində polkovnik-leytenant Zaur Cəfərovun nəşi əvvəlcə valideynlərinin yaşadığı Bakı şəhəri Yeni Ramana qəsəbəsinə gətirilmişdir. II Şəhidlər Xiyabanında dəfn olunmuşdur.Allah bütün şəhidlərimizə rəhmət eləsin!
