Bu il Azərbaycanda arıçılıq sahəsində yenilik olub. Belə ki, ilk dəfə Kəlbəcər yaylaqlarına arıçılıq təsərrüfatları köçürülüb. Avqust ayından etibarən isə Azərbaycanda arıçılar artıq mövsümi ballarını süzməyə başlayacaqlar.RegionTV.info xəbər verir ki, bal istehsalı, arıçılıq təsərrüfatlarının Kəlbəcər yaylaqlarına köçürülməsinin istehsal prosesinə təsiri, bu il gözlənilən bal ixracı ilə bağlı Azərbaycan Arıçılar Assosiasiyasının İdarə Heyətinin sədri Bədrəddin Həsrətov açıqlama verib. Onun sözlərinə görə, artıq bal süzməyə başlanılıb: “Hazırda ölkədə elə ərazilər var ki, artıq üçüncü dəfə bal süzümü həyata keçirilir. Ötən il ölkədə 6 min ton bal istehsal edilmişdi. Bu il ötən illə müqayisədə 500 ton çox bal istehsal ediləcəyi gözlənilir”.
B.Həsrətov arı ailələrinin Kəlbəcərə, Laçına yerləşdirilməsi ilə bağlı məsələyə də toxunub: “Arı ailələrinin Kəlbəcərə yerləşdirilməsi çox yaxşı təsir edib. Bu, pilot layihə olaraq həyata keçirilib. 2 500 arı ailələri Laçında, Kəlbəcərdə yerləşdirilmişdi. Kəlbəcərdə yerləşdirilən arı təsərrüfatlarından 40-50 kq dan çox bal əldə edilib. İşğaldan azad edilmiş ərazilərdə arı ailələrinin köçürülməsi ümumi artıma müsbət təsir edib”.
O qeyd edib ki, Kəlbəcər, Laçın balının bu adla brendləşdirilərək satışa çıxarılması planlaşdırılır: “Bu adın bredləşdirilməsi üçün artıq hökumətə müraciət edilib. Kəlbəcər, Laçın işğaldan azad edilməmişdən əvvəl ermənilər həmin ərazilərə təsərrüfatlarını yerləşdirirdilər və bu adla məhsullarını Avropaya ixrac edə bilirdilər”.
B.Həsrətov deyib ki, işğaldan azad edilmiş digər ərazilərə də arıçılıq təsərrüfatlarının köçürülməsi nəzərdə tutulur: “Sözügedən ərazilər arıçılıq üçün idealdır”.
Assosiasiya sədri bu il bal yarmarkasının keçirilməsi ilə bağlı məsələdən danışıb: “Yarmarkanın keçirilməsi ilə bağlı Kənd Təsərrüfatı Nazirliyinə müraciət etmişik. Lakin pandemiya ilə əlaqədar olaraq hazırda bir cavab verilməyib".
O, Azərbaycanda arıçılıq turizminin yaradıldığını bildirib: “Bu layihə Azərbaycan Arıçılar Assosiasiyası BMT-nin Ərzaq və Kənd Təsərrüfatı Təşkilatı – FAO, Dövlət Turizm Agentliyi ilə birlikdə həyata keçirilib. Artıq Şəkinin Ləkid kəndində olan arıçılıq təsərrüfatları turizm marşrutlarına salınıb. İlkin turistləri qəbul etməyə başlamışıq”.
Azərbaycan Arıçılar Assosiasiyasının İdarə Heyətinin sədri Azərbaycan istehsalı olan arıçılıq məhsullarının Avropa İttifaqı ölkələrinə ixracında problemlə üzləşdiklərini bildiriblər: “Azərbaycanın istehsalı olan heyvan mənşəli qidalar Avropa İttifaqı ölkələrinə ixrac edilmir. Avropa İttifaqı bununla bağlı Azərbaycana icazə verməyib. Lakin Qida Təhlükəsizliyi Agentliyi icazənin alınması istiqamətində iş aparır”.
