Gürcüstanın azərbaycanlıların yığcam yaşadıqları Qardabani rayonunda insident baş verib.RegionTV.info xəbər verir ki, alkoqollu içkinin təsiri altında olan şəxs yanacaq doldurma məntəqəsinin (YDM) ərazisində yerləşən supermarketin kassirini təhqir edib.
Gürcüstanın Daxili İşlər Nazirliyindən bildirilib ki, 1984-cü il təvəllüdlü həmin şəxs operativ əməliyyat-axtarış tədbirləri nəticəsində saxlanılıb. Əvvəllər bir neçə dəfə məhkum edilmiş gənc zorakılıq və xuliqanlıqda ittiham olunur.
İstintaqla müəyyən olunub ki, saxlanılan şəxs qadın kassiri təhqir etdikdən sonra üzərinə kənd təsərrüfatı aləti atıb. Gənc həmçinin onu sakitləşdirməyə çalışan YDM-in etnik azərbaycanlı operatorunu da təhqir edərək ona qarşı fiziki təzyiq göstərib. O, gürcü qadın kassirin müdafiəsinə qalxıb və döyülüb.
Faktla bağlı istintaq tədbirləri davam etdirilir.
