"RegionTV.info"“Dağlıq Qarabağın Rusiyaya birləşdirilməsi ilə bağlı nə indi, nə də gələcəkdə söhbət belə gedə bilməz. Siyasətdən müəyyən təzyiq vasitələri kimi istifadə edə bilərlər, lakin Dağlıq Qarabağı Rusiyaya birləşdirmək mümkün deyil. Rusiya dövlətinin siyasi rəhbərliyi, şəxsən Prezident Vladimir Putin Dağlıq Qarabağı Azərbaycanın ərazi bütövlüyü çərçivəsində tanıyıb”.
Bunu Milli Məclisin deputatı Nəsib Məhəməliyev deyib.
Deputat bildirib ki, Dağlıq Qarabağın Rusiyaya birləşdirilməsi həm çoğrafi, həm də siyasi baxımdan mümkün deyil: “Birincisi, bu, Rusiyaya divident qazandırmaq əvəzinə, əlavə problemlər yarada bilər.
İkincisi isə, “Ədalətli Rusiya” partiyasının sədri Sergey Miranovun bu açıqlaması Dağlıq Qarabağla əlaqəli deyil, Abxaziya, Donbass, Cənubi Osetiya torpaqları ilə bağlıdır. Həmçinin Miranovun Rusiyada stabil fikirli bir siyasətçi kimi qəbul olunmadığını nəzərə alaraq, hesab edirəm ki, bu, seçkiqabağı ritorika məhsuludur. Çünki Miranov zaman-zaman müxtəlif mövzularla bağlı olduğu kimi Azərbaycanın ərazi bütövlüyünün dəstəklənməsi məsələsi ilə bağlı da fərqli fikirlər səsləndirib. Seçilmiş “Rusiya ərazilərinin genişləndirilməsinə nail olmaq” şüarı da parlament seçkiləri ərəfəsində Miranov tərəfindən daxili auditoriyanın rəğbətini qazanmaq məqsədilə səsləndirilmiş fikirdir”.
Nəsib Məhəməliyevin sözlərinə görə, belə fikirlər, adətən, geniş arealda, yəni geosiyasi problemlərin fonunda daha çox səsləndirilir: “Nəzərə almaq lazımdır ki, Rusiyanın Yaxın Şərq bölgəsində Türkiyə ilə ciddi fikir ayrılıqları müşahidə edilir, eyni zamanda son dövrlər tez-tez səsləndirilən böyük Turan ordusunun yaradılması ilə bağlı işartılar daha qabarıq nəzərə çarpır. Rusiya siyasi dairələri və mətbuat orqanları müzakirələrə səbəb olan belə fikirlər, hesab edirəm ki, ermənilər, ermənipərəst qüvvələr tərəfindən daha çox qabardılır və nəticədə, bu fikirlərin fonunda müəyyən təhrikedici bəyanatlar verilir”.
Qeyd: Rusiyada siyasi partiyalar sentyabr ayında keçiriləcək parlament seçkiləri üçün əsas şüarlarını müəyyənləşdirirlər. Sergey Mironovun sədri olduğu “Ədalətli Rusiya” partiyasının “Rusiya ərazilərinin genişləndirilməsinə nail olmaq” şüarı müzakirələrə səbəb olub.
