Xəbər verdiyimiz kimi Prezident İlham Əliyev Azərbaycan kino işçilərinin təltif edilməsi haqqında Sərəncam imzalayıb. Təltif edilənlərdən biri də rejissor, aktyor Rövşən İsaxdır.
O, Azərbaycan kinematoqrafiyasının inkişafında xidmətlərinə görə “Tərəqqi” medalı ilə təltif edilib.
Qeyd edək ki, R.İsax 14 avqust 1970-ci ildə Gəncədə anadan olub. Tam və qısametrajlı bədii, habelə onlarla reklam filminin müəllifidir. Ona “Aktrisa” filmi, “Pərvanələrin rəqsi”, “Vicdan haqqı”, “Yuxu kimi” serialları məşhurluq gətirib.
Rövşən İsax açıqlamasında onu bu təltifə layiq görən hər kəsə təşəkkür edib.
“Başda ölkə başçımız olmaqla, Mədəniyyət Nazirliyinə, bütün kino təşkilatlarına minnətdaram. Bu günə qədər necə çalışmışamsa, bundan sonra da eyni şəkildə davam etməyə çalışacağam. Mən hər zaman dövlətimi sevmişəm, bu gün də sevirəm. Allahı izni ilə son nəfəsimə qədər də sevəcəyəm. Bundan sonra da hər zaman olduğu kimi öz işimə vicdanla yanaşmağa çalışacağam”.
Müsahibimiz bildirib ki, Azərbaycan kinosunun vəziyyəti hazırda yaxşı deyil: “Biz də əlimizdən gələn çalışırıq ki, bu vəziyyəti düzəldə bilək”
