Kəlbəcər ictimaiyyətinə ağır itki üzv vermişdir.Kəlbəcər rayonunun dəyərli Ağsaqqalı, ziyalısı və uzun müddət müxtəlif vəzifələrdə çalışmış Qənbər Şəmşir oğlu haqq dünyasına qovuşmuşdur.
RegionTV.info (Regional İnformasiya Agantliyi)-nin kollektivi olaraq mərhuma Uca Tanrıdan rəhmət diləyir, ailəsinə və yaxınlarına dərin hüznlə başsağlığı verir.Allah yaxınlarına səbir versin . Qənbər Qurbanov hər bir kəlbəcərlinin qəlbində xeyirxah insan, dəyərli ziyalı və el Ağsaqqalı kimi qalacaqdır.
Allah rəhmət eləsin, ruhu şad olsun!
Qeyd edək ki, Qənbər Şəmşiroğlu 16 noyabr 1933-cü ildə Kəlbəcər rayonunun Ağdaban kəndində anadan olub. 1950-ci ildə Yanşaq kənd orta məktəbində təhsilini bitirdikdən sonra bir il kəndli-gənclər kursunda işləyib. 1951-ci ildə Ağdam İkillik Müəllimlər İnstitutunun Azərbaycan dili və ədəbiyyatı fakültəsinə daxil olub. 1953-cü ildə həmin institutu bitirərək Kəlbəcər rayon Ağdaban kənd yeddiillik məktəbində müəllim, 1957-ci ildən isə həmin məktəbin direktoru işləyib. 1957-ci ilin mart ayından 1958-ci ilin avqust ayınadək Kəlbəcər rayon Partiya komitəsində təbliğat-təşviqat şöbəsinin müdiri vəzifəsində çalışıb. 1958-ci ildə Bakı Ali Partiya məktəbinə göndərilib. 1961-ci ildə qiyabi yolla N.Tusi adına institutu, 1964-cü ildə isə Sovet İttifaqı Kommunist Partiyası yanında Ali Partiya məktəbini bitirib.
1960-1966-cı illərdə Ağdaban səkkizillik məktəbidə direktor, 1966-1971-ci illərdə Kəlbəcər qəsəbə orta məktəbidə direktor, 1971-ci ildən 1974-cü ilədək Kəlbəcər RPK-nın ikinci katibi, 1974-1988-ci illərdə Kəlbəcər RİK-in sədri, 1989-cu ilin aprelindən 1991-ci ilin oktyabr ayınadək Gədəbəy RİK-in sədri, 1991-ci ildən 1992-ci ilin may ayınadək Gədəbəy rayon İcra Hakimiyyətinin başçısı, 1993-cü ilin aprel ayından Azərittifaqda baş müşavir, 1993-cü ilin aprel ayından 1994-cü ilin yanvar ayınadək Kəlbəcər rayon İcra Hakimiyyətinin başçısı işləyib. Respublika Ağsaqqallar Şurası Məclisinin üzvü, Aşıq Şəmşir Mədəniyyət ocağı İctimai Birliyinin sədri və Azərbaycan Yazıçılar Birliyinin üzvüdür.
Uzun müdət dövlət fəaliyyətində səmərəli çalışdığına görə Qənbər müəllim "Şərəf Nişanı" ordeni, "Əmək igidliyinə görə" və "Əmək veteranı" medalı ilə təltif edilib. Azərbaycanın sosial-iqtisadi inkişafındakı əməyi müstəqil Azərbaycan dövləti tərəfindən 18 oktyabr 2011-ci ildə "Tərəqqi" medalı ilə dəyərləndirilib.
