Avropa ölkələrində biodizel 1992-ci ildən istehsal olunur. 2008-ci ilin birinci yarısının sonuna Aİ ölkələrində biodizelin istehsalı üzrə 214 zavod, 2010-cu ilin iyulunda Aİ ölkələrində artıq gücü 22 mln.ton olan 245 zavod işləyirdi. Biodiezel, təcrübələrin göstərdiyi kimi, suya düşdükdə bitkilər və heyvanlara ziyan vurmur. Bundan əlavə, demək olar ki, torpaq və ya suda tam bioloji parçalanmaya uğrayır.
Belə ki, mikroorqanizmlər 28 günə biodizelin 99%-ni təkrar emal edir, bu da çaylar və göllərin çirklənməsini minimuma endirməyə imkan verir. Biodizelin tərkibində dizel yanacağı ilə müqayisədə, demək olar ki, kükürd yoxdur. Bu ekoloji baxımdan yaxşıdır. Biodizelin alışma temperaturu 100°C-dən çoxdur.Bu da onu nisbətən təhlükəsiz maddə adlandırmağa imkan verir.
Bəs haqqında bəhs olunan biodizel nədir? Normal dizel ilə əvəz edilməsi mümkündür mü?
Mövzu ilə bağlı olaraqekoloq Cəmşid Bəxtiyar ilə həmsöhbət olub.
O bildirib ki, biodizel dizel yanacağının alternatividir:
“Biodizel bioloji mənşəli xammallardan əldə olunan dizel növüdür. Onu xammal olaraq adətən məişətdə istifadə olunan bitki yağlarından hazırlayırlar. Qızardılmış yağları təkrar istifadə edə bilmədiyimiz üçün tullantı sayılır və istifadayə yararlı olmur. Həmin yağları yenidən emal edərək onlardan dizel yanacağı əldə edirlər. Bu yanacağa həm biodizel, həm də yaşıl dizel deyə bilərik".
Ekspert deyib ki, sözügedən dizelin Azərbaycanda istifadə olunması mümkün deyil:
"Bu dizelin neftdən alnmış forması mümkün olduğu üçün bu yanacaq formasından istifadə olunmur. Bizdə neftdən alınan dizel yanacağından istifadə olunur. Biodizelin xaricdən alınması da yəqin ki, daha çox məsrəf tələb edər, baha başa gələr”.
