Beyin sağlamlığını qorumaq üçün ən vacib qidalanma qaydalarından biri hər gün kifayət qədər su içməkdir. Çünki su içilməyəndə orqanizmdə ilk təsirlənən orqanlardan biri beyin olur. Ona görə də ilk növbədə gündə ən azı 8-10 stəkan su içmək lazımdır! Beynin sağlam işləməsi üçün lazım olan digər vacib məqam isə balanslı qidalanmadır. Bu sözləri qidaelmi.az saytına Qida Məsələləri Üzrə Mütəxəssis Ağa Salamov deyib
Balıq: Omeqa 3 ilə zəngin olan balıq, beyin sağlamlığını qorumaq və gücləndirmək üçün qida rasionuna daxil edilməlidir.Beyin toxumasının böyük bir hissəsi yağ turşularından ibarətdir və daha çox omeqa 3 yağının istehlakı sinirlərə və beynin həcminin qorunmasına yardımçı olur. Beyin sağlamlığı üçün həftədə ən az iki dəfə civəsi az olan və yüksək miqdarda Omeqa 3 ehtiva edən (Skumbriya, Salmon,Farel, Kütüm və.s) balıq yemək lazımdır.
Yumurta: Yumurta bədənimiz üçün lazım olan ən keyfiyyətli heyvan mənşəli zülal mənbələrindən biridir. Xüsusilə, beyin hüceyrələrinin inkişafına kömək etmək kimi son dərəcə əhəmiyyətli bir funksiyanı üzərinə götürür. Bu şəkildə öyrənmə və yaddaş funksiyalarını gücləndirir. Yumurta xolin ehtiva edir ki, xolin yeni beyin hüceyrələrinin yaranmasına da təsir göstərir. Yumurtadakı amin turşuları hüceyrə funksiyası ilə qarşılıqlı əlaqədə olur,psixi və nevroloji pozğunluqların qarşısını almaq üçün neyrotransmitter balansını qorumağa kömək edir. Zehni gücünüzü artırmaq üçün hər səhər yeməyinizdə yumurta olmalıdır.
Tam taxıllar: B qrupu vitaminlərinin mənbəyi olan taxıllar beyin sağlamlığının və güclü yaddaşın qorunması üçün lazımdır. Zəngin lif mənbəyi olan tam taxıl məhsullarını mütləq pəhrizinizə daxil etməlisiniz. Tam buğda unundan hazırlanan çörək B qrupu vitaminlərinin mənbəyidir. B qrupu vitaminləri sinir hüceyrələrinin öz vəzifələrini sağlam şəkildə yerinə yetirmələrini təmin edir və sinir ötürülməsinin düzgün işləməsində iştirak edir. Xüsusilə B qrupu vitaminləri B6, B12 və fol turşusu qanda homosisteinin yüksəlməsini basdıraraq Alzheimer xəstəliyi riskini azalda bilər.
Qoz: Qoz omeqa 3 və 6 yağ turşuları, fosfor, kalsium, kalium və dəmirlə zəngindir. Elmi araşdırmalar qozun yaddaşı, qavrayışı və öyrənmə qabiliyyətini yaxşılaşdırdığını göstərib. Gündə 3-4 bütöv qoz istehlakı beyin sağlamlığı üçün vacibdir. Beyin inkişafı üçün uşaqlar gündə ən az 2 tam qoz və ya omeqa 3 ilə zəngin olan 10/15 ədəd badam yeməlidir.
Qatıq: Zəngin kalsium mənbəyi olan qatıq tərkibindəki tirozinlə yaddaşı gücləndirməyə kömək edir. Gündə ən azı 200 qr qatıq və digər süd məhsulları istehlak etmək məqsədəuyğundur.
Fıstıq: Zəngin bir niasin mənbəyi olan fıstıq bu xüsusiyyəti ilə beyin sağlamlığını qorumağa kömək edir. Sinir sisteminin sağlam işləməsinə yardımçı olmaqla yanaşı, Alzheimer riskini də azaldır. Bununla belə, fıstığın allergik və yüksək kalorili olduğunu da unutmayın. Buna görə gündə 15/20 ədəd istehlak etməklə kifayətlənmək lazımdır.
